සටහන – රුවන් නෙළුගොල්ල
මෙරට සිටි ප්‍රවීණම, ජ්‍යෙෂ්ඨම සහ කෘතහස්ත දේශපාලඥයකු වූ අභාවප්‍රාප්ත හිටපු අමාත්‍ය මංගල සමරවීර මහතාගේ සහෝදරියගේ දියණිය වන චංචලා ගුණවර්ධන මහත්මිය ඉදිරි ජනාධිපතිවරණය වෙනුවෙන් විපක්ෂ නායක සජිත් ප්‍රේමදාස මහතාට සහාය පළ කිරීමේ අරමුණින් සමගි ජන බලවේගය හා එක්වී තිබේ.
ඇය සමගි ජන බලවේගයට එක්වීමෙන් අනතුරුව මාතර දිස්ත්‍රික් සංවිධායක ධුරයට පත් කිරීමට විපක්ෂ නායක සජිත් ප්‍රේමදාස මහතා කටයුතු කර ඇත.
මංගල සමරවීර මහතාගේ අභාවයෙන් පසු ඔහුගේ පවුලෙන් දේශපාලනයට පිවිසි පළමු තැනැත්තිය ලෙස චංචලා ගුණවර්ධන මහත්මිය නම් කළ හැක.
චංචලා ගුණවර්ධන මහත්මිය ඊයේ (17) පස්වරුවේ මාතර, අකුරැස්සේදී පැවති සජිත් ප්‍රේමදාස මහතාගේ ජන රැලියටත් එක්ව සිටියාය.
