දැනට සහල් හිඟයක් ඇති වෙතැයි බියක් තබා ගත යුතු නැති අතර දැනට රට තුළ පවතින වී සහ සහල් තොග ලබන මහ කන්නයේ අස්වනු ලැබෙන තෙක් ප්‍රමාණවත් වනු ඇති බව කෘෂිකර්ම අමාත්‍ය මහින්ද අමරවීර මහතා පවසයි.
නමුත් රජය සතුව අමතර සහල් හෝ වී තොග (Buffer stock) නැති බවත් දැනට සියලු වී තොග පවතින්නේ පුද්ගලික අංශයේ බවත් අමාත්‍යවරයා සඳහන් කළේය.
එසේම වී අලෙවි මණ්ඩලය වී මිල දී ගැනීම ආරම්භ කළ ද ගොවීන් වී අලෙවි මණ්ඩලයට වී අලෙවි කිරීමෙන් වැළකී සිටින බවත් එමනිසා ඉදිරි කාලය තුළ සහල් හිඟයක් ඇති නොවුනත් වෙළෙඳ පොළේ සහල් මිල යම් ප්‍රමාණයකට ඉහළ යනු ඇති බවත් අමාත්‍යවරයා පැවසීය.
ඒ අනුව, පුද්ගලික අංශය සතුව වී තොග පවතින හෙයින් සහල් මිල ඉහළ ගියහොත් ඊට මුහුණ දීමට මෙන්ම පාරිභෝගිකයා ආරක්ෂා කර ගැනීමේ වැඩපිළිවෙළක් ක්‍රියාත්මක කිරීමට රජයට සිදු වනු ඇති බවත් අමාත්‍යවරයා වැඩිදුරටත් ප්‍රකාශ කළේය.
අමාත්‍ය මහින්ද අමරවීර මහතා මේ බව පැවසුවේ අම්බලන්තොට වී පර්යේෂණායතනය විසින් සංවිධානය කරන ලද ජාතික ක්ෂේත්‍ර දින උත්සවයට පසුගිය 19 වනදා එක්වෙමිනි.
RN
