සැප්තැම්බර් 14 සහ 16 දිනවල පැවත්වෙන ජෝන් ටාබට් තරගාවලියේ අවුරුදු 18 න් පහළ මලල ක්‍රීඩා ඉසව්, ඔක්තෝම්බර් 13 – 17 දක්වා කුවේට් හී පැවත්වෙන ආසියානු යොවුන් මලල ක්‍රීඩා සූරතාවලියේ අවසාන තේරීම් බව මලල ක්‍රීඩා සංගමය දන්වා ඇතත් යොවුන් මලල ක්‍රීඩකයන්ට නිසි පරිදි පුහුණුවීමට අවස්ථාව සුගතදාස ක්‍රීඩා අධිකාරියේ පාලනය විසින් ලබා නොදීම කණගාටුදායක තත්ත්වයකි.
ක්‍රීඩාංගණය වෙනත් කටයුතු සඳහා ලබා දීමේදී ආසන්නයේ පැවත්වෙන ජාත්‍යන්තර තරගාවලියට සහභාගි වීමේ බලාපොරොත්තු ඇතිව පුහුණුවන යොවුන් ක්‍රීඩකයන්ට පෙර සූදානම සඳහා ඇති ධාවන පථය හෝ ලබා නොදීමට ක්‍රීඩාංගණ බලධාරීන් කටයුතු කරමින් සිටියි.මලල ක්‍රීඩා සංගමය එක ඉසව්වක හොඳම අටකගේ නම් පුහුණුව සඳහා අවස්ථාව දීමට මලල ක්‍රීඩා බලධාරීන් සුගතදාස අධිකාරියට ඉදිරිපත් කර ඇතත් ඒ සියල්ලටම අවසර දීමද සුගතදාස අධිකාරිය ප්‍රතික්ෂේප කර ඇත.
එම අට දෙනාම කොළඹ පුහුණුව නොකරන තත්ත්වයක මෙසේ පිරිසක් ඉවත් කිරීම තාර්කික නැති අතර හොඳ පුහුණුවක් වැඩි පිරිසකට ලැබීම නිසා ඉසව්වේ තරගකාරී මට්ටම ඉහළ යාම ද,එයින් ඉසව්වේ ප්‍රතිපලය වඩාත් ගුණාත්මක එකක් වීමද සිඳුවන බව සුගතදාස පරිපාලනයට නොවැටහීම ඛේදවාචකයකි.
පොදු රාජ්‍ය මණ්ඩලීය පදක්කම් දිනූවන් ඇගයීමේ උළෙලට එක්වෙමින් අමාත්‍යංශ ලේකම් වෛද්‍ය අමල් හර්ෂ ද සිල්වා ප්‍රකාශ කළේ ක්‍රීඩාවට සම්බන්ධ සියල්ලගේ සහයෝගය ක්‍රීඩාවේ දියුණුවට අවශ්‍යය බවය.නමුත් අමාත්‍යංශය යටතේ ඇති සුගතදාස අධිකාරියෙන්ම මලල ක්‍රීඩාවට මේ ආකාරයෙන් කෙනහිලි සිදුවීම ලේකම්වරයාගේ අදහසට පටහැනිය.
RM
