සටහන – රුවන් නෙළුගොල්ල
වර්තමාන රජය එක පරිපාලන සමාගමක් යටතේ වෙනත් උපසමාගම් වශයෙන් විදුලිබල මණ්ඩලය තබා ගන්නා බව මුලින් සඳහන් කළත් පසුව ඔවුන් වෙන් වෙන් සමාගම් 5ක් පිහිටුවීමෙන් සිය ප්‍රතිසංස්කරණ ක්‍රියාවලියේ මාර්ගය වෙනස් කර ඇති බවත් එහිදී ඔවුන් යහපාලනයක් පෙන්වීමට අපොහොසත් වී ඇති බවත් ලංකා විදුලිබල මණ්ඩල ඉංජිනේරු සංගමය පවසයි.
වත්මන් ලංවිම ප්‍රතිසංස්කරණ බලධාරීන් සමග කටයුතු කිරීම විශ්වසනීය නොවන හා අනාරක්ෂිත බවක් පෙනී යන අතර මෙම ක්‍රියාවලියේදී බොහෝ සේවකයින් ඉල්ලා අස්වන බවත් විශේෂයෙන්ම තාක්ෂණික කාර්ය මණ්ඩලය විදේශගත වනු ඇති බවත් පවසන එම සංගමය මෙම තත්වය තුළ අනාගතයේදී බොහෝ විදුලි බිඳවැටීම් යථා තත්වයට පත්කිරීමට මහත් ශ්‍රමයක් හා කාලයක් මෙන්ම අධික වියදමක් වුවද දැරීමට සිදුවනු ඇති බවත් සඳහන් කරයි.
මෙම රජය ජනතා කේන්ද්‍රීය රජයක් ලෙස ඔවුන්ව විසින් හඳුන්වාගන්නේ නම්, රජය ක්‍රියා කළ යුතු වන්නේ සමාජයේ සහ රටේ ජනතාවගේ අවශ්‍යතා සපුරාලීමට මිස තනි පුද්ගලයෙකුගේ හෝ අතලොස්සක් වූ කිහිප දෙනෙකුගේ පුද්ගලික ඉලක්ක සපුරාලීමට නොවන බව අවධාරණය කර ඇති එම සංගමය නිවේදනයක් නිකුත් කරමින් ප්‍රකාශ කර ඇත්තේ ප්‍රතිසංස්කරණ ක්‍රමවේදය සහ ක්‍රියාවලිය නැවත සලකා බලන ලෙස රජයෙන් දැඩිව ඉල්ලා සිටින බවයි.
ලංකා විදුලිබල මණ්ඩල ඉංජිනේරු සංගමය නිකුත් කර ඇති සම්පූර්ණ නිවේදනය පහතින් දැක්වේ.
