රෂිකා හෙන්නායක සැප්තැම්බර් 04, කොළඹ LNW :
ශ්‍රී ලාංකික සරණාගතයෙකුගේ සිට සිලිකන් නිම්නයේ දැවැන්තයෙකු දක්වා: චමත් පලිහපිටිය සිය 50 වැනි උපන්දිනයේදී ලොවට දෙන ප්‍රබල පණිවිඩය
යුද්ධයෙන් බැටකෑ දූපතක අඳුරු සෙවනැලි මැද උපත ලබා, පසුව ලොව තාක්ෂණික කේන්ද්‍රස්ථානය වන සිලිකන් නිම්නයේ අග්‍රගන්‍ය ආයෝජකයෙකු සහ ව්‍යවසායකයෙකු ලෙස නැගී සිටීම සැබවින්ම මවිතකර වෘතාන්තයකි. ඔහු චමත් පලිහපිටියයි. සිය 50 වැනි උපන්දිනය සැමරීමේදී ඔහු ලොවට මුදාහළ පණිවිඩය සුබපැතුම් වැකියක් නොවේ; එය අගාධයේ සිට මුදුනටම ගිය මිනිසෙකු පසක් කරගත් ජීවන දර්ශනයකි.
කටුක අතීතය සහ මුල්කාලීන අරගලය
චමත්ගේ සාර්ථකත්වය යනු ක්ෂණික වාසනාවක් නොව, කටුක අත්දැකීම් සහ නොපසුබට උත්සාහය මත තැනුණු පදනමකි. 1976 දී ලංකාවේ සිවිල් යුද්ධයේ අභියෝග මැද උපත ලද ඔහු, පසුව කැනඩාවේ සරණාගතයෙකු ලෙස ජීවිතය ඇරඹීය. ඔහුගේ පවුල නඩත්තු වූයේ රජයේ සුබසාධන (Welfare) ආධාර මතිනි.
ඔහු සිය ළමා කාලය විස්තර කරන්නේ ‘අසාර්ථක දරුවෙකු’ ලෙසයි. පාසල් ජීවිතයේ අවසානය දක්වාම අරමුණක් නොතිබූ ඔහු, වයස 14 දී බර්ගර් කිං (Burger King) හි රැකියාව කළේ සිය දෙමාපියන්ට බස් ප්‍රවේශපත්‍ර පවා මිලදී ගැනීමට මුදල් නොතිබූ බැවිනි. තම මුල්කාලීන වැටුපෙන් එම බර කරට ගත් ඔහු, අවසාන වසරේදී තම ජීවිතය නිසි මඟට ගනිමින් විශිෂ්ට සරසවියකට ඇතුළත් වීමට සමත් විය.
ඔහුගේ මව පිළිබඳව ඔහු මෙසේ අවධාරණය කරයි..
"අපි හැදී වැඩුණේ සුබසාධන ආධාර මතයි. ඒ සියලු දුෂ්කරතා මධ්‍යයේ වුවද අපේ පවුල බිඳ වැටෙන්නට නොදී ශක්තිමත්ව තබා ගනිමින් ඉදිරියටම රැගෙන ගියේ මගේ මවයි."
ඇමරිකානු සිහිනය: "ලොව විශිෂ්ටතම දේශය සැබවින්ම ඇමරිකාවයි"
චමත් පලිහපිටිය යනු ඇමරිකානු සිහිනයේ සජීවී සාක්ෂියකි. ඔහු පසක් කර දෙන්නේ ඇමරිකාව වැනි අවස්ථාවන්ගෙන් පිරි පරිසරයක පමණක් මෙවැනි අසමසම ජයග්‍රහණ අත්පත් කරගත හැකි බවයි. මෙය හුදෙක් දේශප්‍රේමී සටන් පාඨයක් නොව, තම ව්‍යවසායකත්ව ගමනට සහ පවුල් ජීවිතයට ලැබුණු අසීමිත අවස්ථාවන් පිළිබඳව කෙරෙන බුද්ධිමත් විග්‍රහයකි.
ඔහු පවසන පරිදි,
“ලොව විශිෂ්ටතම දේශය සැබවින්ම ඇමරිකාවයි. ඕනෑම දෙයක් මෙහිදී සැබෑ කරගත හැකිය. ඒ සඳහා මම සාක්ෂි දරමි. මෙහි සිටීම පිළිබඳව කෘතවේදී වන්න.”
තමන්ගේ පවුල, දරුවන් සහ තමන්ට ගැළපෙන සමීපතම මිනිසුන් (Tribe) හමු වූයේ මෙම භූමියේදී බැවින්, ඔහු තවමත් එම අවස්ථාවන්ට ගරු කරමින් එහි රැඳී සිටියි.
අසාර්ථකත්වය සහ “ඉදිරියට යාම” පිළිබඳ දර්ශනය
සැබෑ ව්‍යවසායකයෙකු අසාර්ථකත්වය දකින්නේ අවසානයක් ලෙස නොව, පාඩමක් ලෙසය. චමත් සිය පනස් වසරක ජීවිතය තුළ මුහුණ දුන් මරණ, දික්කසාද, මූල්‍ය කඩාවැටීම් සහ තමන් අතින් වූ වැරදි කිසිවක් සඟවන්නේ නැත. සාර්ථක මිනිසුන් සහ අසාර්ථක මිනිසුන් අතර ඇති වෙනස වන්නේ අසාර්ථකත්වයට මුහුණ දෙන ආකාරයයි.
ඔහුගේ ප්‍රබලම උපදේශය මෙයයි: "වැරදි වලින් ඉගෙන ගන්න. ඒවාට ගරු කරන්න. නමුත් එතැනින් ඉදිරියට යන්න ."
අතීත වැරදි තුළ සිර නොවී, එම අත්දැකීම් උපයෝගී කරගෙන ඊළඟ පරිච්ඡේදය කරා පියනැගීම ජීවිතයේ ජයග්‍රහණය බව ඔහු අවධාරණය කරයි.
ධනයට එහා ගිය සැබෑ වටිනාකම්
ලොව දියුණුතම ධනේශ්වර ක්‍රමය තුළ ජයග්‍රහණය කළ බිලියනපතියෙකු, ජීවිතයේ අවසානයේ ධනය හෝ වෘත්තීය සාර්ථකත්වය වැදගත් නොවන බව පැවසීම සැබවින්ම ප්‍රතිවිරුද්ධ අදහසකි. ඔහු පවසන්නේ සාර්ථකත්වය මනින්නේ බැංකු ගිණුමෙන් නොව, පුද්ගල චරිතයෙන් බවයි.
ඔහු තම දරුවන්ට සහ ලොවට වැදගත් යැයි යෝජනා කරන සැබෑ ජීවන වටිනාකම් මෙසේය…..
- කරුණාවන්තකම (Kindness): අන් අය කෙරෙහි දක්වන දයාව සියල්ලටම වඩා උසස්ය.
- විනෝදය (Fun): ජීවිතය සතුටින් හා සැහැල්ලුවෙන් භුක්ති විඳීම.
- අර්ථවත් වැඩ (Meaningful work): මුදලට එහා ගිය අරමුණක් සහිතව කටයුතු කිරීම.
- ප්‍රජාව (Community): තමන්ට ගැළපෙන, තමන්ව තේරුම් ගන්නා මිනිසුන් අතර ජීවත් වීම.
- පරිදර්ශනය (Perspective): ලෝකය දෙස පටු දෘෂ්ටිකෝණයකින් නොව පුළුල් හා ගැඹුරු අවබෝධයකින් බැලීම.
- යහපත් සහකරු (Good Partner): ජීවිත ගමනට අර්ථයක් දෙන සුදුසුම සහකරුවෙකු තෝරා ගැනීම.
- ත්‍රාසජනක අත්දැකීම් (Adventure): ජීවිතය ගවේෂණය කරමින් නව අත්දැකීම් වලට මුහුණ දීම.
ප්‍රාග්ධනය හඹා ගිය මිනිසෙකු, අවසානයේ “මනුෂ්‍යත්වය සහ අත්දැකීම්” ජීවිතයේ ලොකුම වත්කම් ලෙස නම් කිරීම ඕනෑම ව්‍යවසායකයෙකු ගැඹුරින් සිතිය යුතු කරුණකි.
චමත් පලිහපිටිය සිය පළමු වසර 50 දකින්නේ “අදහාගත නොහැකි ත්‍රාසජනක ගමනක්” ලෙසයි. ඔහු සිය ඊළඟ වසර 50 දෙස බලන්නේද එවැනිම උද්යෝගයකින් යුත්, තවමත් අවසන් නොවූ “අතිශය වේගවත් ගමනක්” ලෙසයි.
