කොළඹ LNW:අයිස් මත්ද්‍රව්‍ය නිෂ්පාදනයට භාවිත කරන රසායනික ද්‍රව්‍ය කිලෝග්‍රෑම් 50,000ක් පමණ මිද්දෙණිය, තලාව ප්‍රදේශයේ නිවසක වළදමා තිබියදී පොලීසිය විසින් ඊයේ (05) සොයා ගනු ලැබූ අතර ඒවා කෙහෙල්බද්දර පද්මේ විසින් මෙරටට ගෙන්වා ඇති බව බැකෝ සමන් නමැත්තා කළ හෙළිදරව්වකින් අනාවරණය විය.
කෙසේවෙතත් ඒවා සඟවා තබාගෙන සිට ඇත්තේ ශ්‍රී ලංකා පොදුජන පෙරමුණේ හිටපු ප්‍රාදේශීය සභා මන්ත්‍රීවරයෙක් හා ඔහුගේ සහෝදරයා විසින් බව පොලීසිය අනාවරණය කර ගත් අතර ඒ අනුව සිද්ධිය සම්බන්ධයෙන් ශ්‍රී ලංකා පොදුජන පෙරමුණේ හිටපු ප්‍රාදේශීය සභා සභිකයෙකු වන පියල් මනම්පේරි අත්අඩංගුවට ගෙන තිබේ.
බස්නාහිර උතුර අපරාධ විමර්ශන කොට්ඨාසය විසින් ඊයේ (05) සිදුකළ මෙහෙයුමකදී එම රසායනික ද්‍රව්‍ය සොයාගනු ලැබීය.
මේ අතර සම්පත් මනම්පේරි නමැත්තාගේ පක්ෂ සාමාජිකත්වය තහනම් කිරීමට වහාම ක්‍රියාත්මක වනපරිදි පියවර ගෙන ඇති බවද ශ්‍රී ලංකා පොදුජන පෙරමුණ නිවේදනයක් නිකුත් කරමින් පවසයි.
ඔහුට එරහිව එල්ල වී ඇති චෝදනාව ඉතා බරපතල හෙයින් අදාළ පරීක්ෂණ ඉතා ඉක්මණින් අවසන් කොට ජනතාවට සත්‍ය තත්ත්වය හෙළිදරව් වනු ඇති බවට විශ්වාසය පළකරන බවද එහි වැඩිදුරටත් දැක්වෙයි.
ආශිකා බ්‍රාහ්මණ
