රෂිකා හෙන්නායක සැප්තැම්බර් 07, කොළඹ LNW :
‘ඩිට්වා’ (Ditwa) සුළි කුණාටුව හේතුවෙන් දැඩි ලෙස හානියට පත්වී අඩාල වූ පේරාදෙණිය සහ කොළඹ අතර දුම්රිය සේවාව ඔක්තෝබර් මාසයේදී යළි ආරම්භ කිරීමට අපේක්ෂා කරන බව ප්‍රවාහන හා මහාමාර්ග නියෝජ්‍ය අමාත්‍ය ආචාර්ය ප්‍රසන්න ගුණසේන මහතා පැවසීය.
රඹුක්කන සහ කඩුගන්නාව අතර ප්‍රධාන දුම්රිය මාර්ගයේ ගංවතුරින් දැඩි ලෙස හානියට පත් කොටසේ ප්‍රතිසංස්කරණ කටයුතු සැප්තැම්බර් 15 වන විට අවසන් කිරීමට නියමිත බව ඔහු සඳහන් කළේය.
‘ඩිට්වා’ සුළි කුණාටුවෙන් පසු ඇති වූ නායයෑම් හේතුවෙන් උඩරට දුම්රිය මාර්ගයේ ස්ථාන 97ක් දැඩි ලෙස බලපෑමට ලක් වූ බව නියෝජ්‍ය අමාත්‍යවරයා පැවසීය.
රඹුක්කන-කඩුගන්නාව කොටසේ ස්ථාන කිහිපයක ඉදිකිරීම් කටයුතු දැනටමත් අවසන් කර ඇති අතර, ඉතිරි ස්ථාන දෙකක කටයුතු වේගයෙන් සිදු වෙමින් පවතින බව ද ඔහු පැවසීය.
දුම්රිය මාර්ග ප්‍රතිසංස්කරණ කටයුතු සිදු කරන සමාගමේ ස්ථාන භාර ඉංජිනේරු තිලින ස්වර්ණමාල් මහතා පැවසුවේ, රඹුක්කන-කඩුගන්නාව කොටසේ කටයුතු අවසාන අදියරට පැමිණ ඇති අතර සැප්තැම්බර් 15 වන විට එය සම්පූර්ණයෙන්ම නිම කිරීමට අපේක්ෂා කරන බවයි.
මේ අතර, මහවැලි ගඟේ ජල මට්ටම ඉහළ යාම හේතුවෙන් ඉදිකිරීම් යන්ත්‍රෝපකරණ ජලයෙන් යටවීම නිසා ‘ඩෙවිල්ස් බ්‍රිජ්’ (Devil’s Bridge) හෙවත් ‘බ්ලැක් බ්‍රිජ්’ (Black Bridge) ලෙස හැඳින්වෙන පේරාදෙණියේ පාලමේ ඉදිකිරීම් කටයුතු ද තවත් බාධාවකට මුහුණ දී තිබේ.
කෙසේ වෙතත්, එම පාලමේ ඉදිකිරීම් කටයුතු කඩිනමින් අවසන් කර කොළඹ සහ මහනුවර අතර දුම්රිය සේවාවන් ඉක්මනින් යළි ආරම්භ කිරීමට හැකි වනු ඇතැයි නියෝජ්‍ය අමාත්‍ය ගුණසේන මහතා පැවසීය.
