මුහුණ දී සිටින දැවැන්ත ආර්ථික අර්බුදයෙන් ගොඩ ඒම සඳහා ජාත්‍යන්තර මුල්‍ය අරමුදලේ සහාය ලබා ගැනීම සඳහා ශ්‍රී ලංකාව දැඩි උත්සාහයක් දරමින් සිටිනවා. මෙරටදී මෙන්ම IMF මූලස්ථානයේදීද ඊට අදාල සාකච්ඡා වට කිහිපයක් පැවැත්වූ නමුත් තවමත් එම උත්සාහය සාර්ථක වී නොමැත.
මුල්‍ය අරමුදල පවසන්නේ ණය සහන ලබාදීමට නම් ශ්‍රී ලංකාව විදෙස් රටවලින් සහ මුල්‍ය ආයතනවලින් ලබාගෙන ඇති ණය ප්‍රතිව්‍යූහගත කළයුතු බවයි. කෙසේ නමුත් ණය ප්‍රතිව්‍යූහගත කිරීම සඳහා ශ්‍රී ලංකාවේ ප්‍රධානතම ණය සහකරුවා වන චීනය ඇතුළු පාර්ශ්ව රැසක් තවමත් එකඟ වී නොමැත.
රොයිටර් පුවත් සේවය වාර්තා කරන්නේ ශ්‍රී ලංකාව ඇතුළු ණය ලබාගෙන ඇති රටවල් රැසක් චීනයෙන් ණය සහන ඉල්ලා තිබෙන බවයි. මේ නිසා ණය ප්‍රතිව්‍යූහගත කිරීමේ ප්‍රතිපත්තිය සම්බන්ධයෙන් නැවත වරක් සිතා බැලීමට සිදුවන බවද රොයිටර් වාර්තා කරනවා.
ණය කොන්දේසි පිළිබඳව හා ණය ගෙවීමට නොහැකි රටවල් සමග එකඟතාවයකට පැමිණෙන්නේ කෙසේදැයි ප්‍රසිද්ධ නොකරන ලෝකයේ ප්‍රධානතම ද්විපාර්ශ්වික ණය දෙන්නා වන චීනයට මෙම තත්වය තුළ නව අභියෝගයක් මතුව ඇති බවද රොයිටර් වාර්තාවේ සඳහන් වේ.
2000 වසරේ සිට 2017 වසර දක්වා චීනය ලෝකයේ රටවල් 165 කට ලබා දී ඇති සමස්ත ණයවල වටිනාකම ඇමරිකානු ඩොලර් බිලියන 843 කි. මෙම ණයවලින් පොලී රහිත ණය ප්‍රතිශතය 05% කට වඩා අඩු වේ.
චීනය විසින් අප්‍රිකානු රටවල් 17 කට අවස්ථා 23 කදී ලබා දී තිබූ පොලී රහිත ණය කපාදමා තිබෙනවා.
UN
