රෂිකා හෙන්නායක සැප්තැම්බර් 17, කොළඹ LNW :
පොලිස් නිෂ්කාශන සහතික (Police Clearance Certificates) අයදුම්කරුවන් සඳහා දවසේ පැය 24 පුරාම සහාය ලබා දීම –
විදේශ සංචාර සහ විදේශ රැකියා සඳහා අවශ්ය පොලිස් නිෂ්කාශන සහතික ලබා ගැනීමේදී දුෂ්කරතාවලට මුහුණ දෙන අයදුම්කරුවන්ට සහාය වීම සඳහා ශ්රී ලංකා පොලිසිය විසින් නව දුරකථන අංක කිහිපයක් හඳුන්වා දී ඇත.
ශ්රී ලංකා පොලිස් මූලස්ථානය නිකුත් කළ නිවේදනයකට අනුව, අයදුම්කරුවන්ට දැන් 071 859 59 46, 071 859 59 47 සහ 071 859 59 48 යන පැය 24 පුරා ක්රියාත්මක දුරකථන අංක ඔස්සේ පැමිණිලි ඉදිරිපත් කිරීමට සහ සහාය ලබා ගැනීමට හැකියාව ඇත.
පොලිස් නිෂ්කාශන සහතික නිකුත් කිරීමේ පරිගණක පද්ධතියේ අත්යවශ්ය නඩත්තු කටයුතු සිදු කෙරෙන අතරතුර, එම සහතික ලබා ගැනීමට අපේක්ෂා කරන පුද්ගලයින්ට බාධාවකින් තොරව සහාය ලබා දීම සඳහා මෙම පියවර හඳුන්වා දී ඇති බව පොලිසිය පැවසීය.
තාවකාලික විධිවිධානවල කොටසක් ලෙස, අයදුම්කරුවන්ට දැන් අදාළ ප්රාදේශීය පොලිස් ස්ථාන හරහා පොලිස් නිෂ්කාශන සහතික සඳහා ඉල්ලීම් ඉදිරිපත් කළ හැකිය.
පරිගණකගත නිෂ්කාශන සහතික පද්ධතියේ හදිසි නඩත්තු කටයුතු සිදු කිරීම හේතුවෙන් මාර්ගගත (online) අයදුම් කිරීමේ ක්රියාවලිය තාවකාලිකව අත්හිටුවා ඇති බව පොලිසිය පැහැදිලි කළේය. පද්ධතිය සම්පූර්ණයෙන්ම යථා තත්ත්වයට පත් වන තුරු, විකල්ප ක්රමවේදය හරහා නිෂ්කාශන සහතික සැකසීමේ කටයුතු අඛණ්ඩව සිදු කෙරෙනු ඇත.
අයදුම්කරුවන්ට www.police.lk වෙබ් අඩවියට පිවිස, ‘Digital Services’ (ඩිජිටල් සේවා) අංශය වෙත ගොස් ‘Clearance Certificate’ (නිෂ්කාශන සහතිකය) යන්න තෝරා ගැනීමෙන් අදාළ අයදුම්පත බාගත කරගත හැකිය.
අයදුම්පත සම්පූර්ණ කිරීමෙන් පසු, අයදුම්කරුවන් විසින් ජාතික හැඳුනුම්පත, විදේශ ගමන් බලපත්රය සහ උප්පැන්න සහතිකය යන ලේඛනවල පිටපත් සමඟ එය ඉදිරිපත් කළ යුතුය. ජාතික හැඳුනුම්පතේ සහ විදේශ ගමන් බලපත්රයේ සඳහන් නම් අතර යම් විෂමතාවක් පවතී නම්, දිවුරුම් ප්රකාශයක පිටපතක් ද ඉදිරිපත් කළ යුුතු වේ.
දැනට විදේශයන්හි පදිංචි ශ්රී ලාංකික පුරවැසියන්ට අවශ්ය ලේඛන සමීපතම ඥාතියෙකු මාර්ගයෙන් අදාළ පොලිස් ස්ථානය වෙත භාර දිය හැකි බව ද පොලිසිය වැඩිදුරටත් සඳහන් කළේය.
ශ්රී ලංකා පොලිස් නිෂ්කාශන සහතිකයක් ලබා ගැනීමට අපේක්ෂා කරන විදේශීය ජාතිකයින්ට උපදෙස් දෙනු ලබන්නේ, ඔවුන්ගේ අදාළ රටවල පිහිටි ළඟම ඇති ශ්රී ලංකා තානාපති කාර්යාලය හෝ රාජ්යතාන්ත්රික දූත මණ්ඩලය හරහා තම අයදුම්පත් ඉදිරිපත් කරන ලෙසයි.
