සටහන – රුවන් නෙළුගොල්ල
2010 – 2014 සමයේ අමාත්‍යවරයකු ලෙස කටයුතු කරමින් සිටියදී සිය නීත්‍යානුකූල ආදායමින් උපයාගත නොහැකි රුපියල් මිලියන 75ක පමණ මුදල් හා දේපළ උපයාගැනීම සම්බන්ධයෙන් අල්ලස් හෝ දූෂණ චෝදනා විමර්ශන කොමිසම විසින් පාර්ලිමේන්තු මන්ත්‍රී විමල් වීරවංශ මහතාට එරෙහිව ගොනුකර ඇති නඩුවේ වැඩිදුර විභාගය ඔක්තෝබර් 22 වනදා සිට පැවැත්වීමට කොළඹ මහාධිකරණය නියම කර තිබේ.
ඒ, එම නඩුව ඊයේ (17) කොළඹ මහාධිකරණ විනිසුරු ලංකා ජයරත්න මහත්මිය හමුවේ කැඳවූ අවස්ථාවේදී ය.
එහිදී නඩුව පිළිබඳ නිසි අධ්‍යනයක් කිරීමට තමන්ට ප්‍රමාණවත් කාලයක් නොලැබුණු බැවින් වෙනත් දිනයක් ලබාදෙන ලෙස විමල් වීරවංශ මහතා වෙනුවෙන් පෙනී සිටි ජනාධිපති නීතීඥ අනුර මැද්දේගොඩ මහතා කළ ඉල්ලීමක් පිළිගනිමින් විනිසුරුවරිය මෙසේ නියම කළාය.
එමෙන්ම සිතාසි ලැබුණහොත් අධිකරණයේ පෙනී සිටින ලෙසත් විනිසුරුවරිය පැමිණිල්ලේ සාක්ෂිකරුවන්ට අවවාද කළාය.
විමල් වීරවංශ මහතාට එරෙහිව මෙම නඩුව ගොනුකර ඇත්තේ 2017 වසරේදී වන අතර විත්ති පාර්ශ්වය විවිධ හේතු දක්වමින් කල්ගැනීම නිසා වසර හතක් තිස්සේ මෙම නඩුව විභාගයට ගැනීමට නොහැකිව කල් ඇදෙමින් පැවතිණි.
