- සටහන – නදීක දයා බණ්ඩාර
- සැප්තැම්බර් 21, මහනුවර (LNW): ජනාධිපතිවරණයේ ඡන්ද සලකුණු කිරීම පස්වරු 04.00ට නිමාවීමත් සමඟ පස්වරු 04.30ට පමණ තැපැල් ඡන්ද ගණන් කිරීම ආරම්භ කරන බව මහනුවර දිස්ත්‍රික් තේරීම්භාර නිලධාරී චන්දන තෙන්නකෝන් මහතා පවසයි.
මේ වන විට සියලුම ඡන්ද පෙට්ටි ගණන් කිරීමේ මධ්‍යස්ථාන වෙත ප්‍රවාහනය කිරීම පස්වරු 03.00 පමණ වන විට අවසන් කළ බව ද ඒ මහතා පැවසුවේය.
මහනුවර දිස්ත්‍රික් තේරීම්භාර නිලධාරීවරයා මෙම අදහස් පළ කරන ලද්දේ අද (21) පස්වරුවේ පොල්ගොල්ල මහින්ද රාජපක්ෂ රංග ශාලා පරිශ්‍රයේ පැවැති මාධ්‍ය හමුවකට එක් වෙමිනි.
ඒ අනුව මධ්‍යම රාත්‍රීය පමණ වන විට මහනුවර දිස්ත්‍රික්කයට අදාල තැපැල් ඡන්ද ප්‍රතිඵල නිකුත් කළ හැකි යැයි ද ඒ මහතා පැවසුවේය.
මැතිවරණ ක්‍රියාවලිය සඳහා රාජ්‍ය නිලධාරීන් 8600ක් ද ගණන් කිරීමේ කටයුතු සඳහා 1500ක් සහ අනිකුත් කටයුතු සඳහා 600ක් යොදවා ඇතැයි ද චන්දන තෙන්නකෝන් මහතා තව දුරටත් ප්‍රකාශ කළේය.
