සටහන – රුවන් නෙළුගොල්ල
ශ්‍රී ලංකා පොදුජන පෙරමුණේ හිටපු පළාත් පාලන මැතිවරණ අපේක්ෂකයකු වූ සම්පත් මනම්පේරි නමැත්තා රක්ෂිත බන්ධනාගාරගත කර තිබේ.
ඒ, පොලිස් මත්ද්‍රව්‍ය නාශක කාර්යාංශය භාරයේ රඳවාගෙන ප්‍රශ්න කරමින් සිටි ඔහුව ඊයේ (23) දිනයේදී වලස්මුල්ල මහෙස්ත්‍රාත් අධිකරණයට ඉදිරිපත් කිරීමෙන් අනතුරුව ය.
ඒ අනුව, මිද්දෙණිය ප්‍රදේශයේදී අයිස් මත්ද්‍රව්‍ය නිපදවීමට යොදාගන්නා බවට සැක කෙරෙන රසායනික ද්‍රව්‍ය අඩංගු කන්ටේනර් දෙකක් සඟවා තැබීමේ සිද්ධිය සම්බන්ධයෙන් ඔහුව ලබන 26 වනදා දක්වා රක්ෂිත බන්ධනාගාරගත කිරීමට නියම කෙරිණි.
ඊට අමතරව මිද්දෙණිය, තලාව ප්‍රදේශයේදී සම්පත් මනම්පේරිගේ මිතුරියකගේ නිවසක තිබී රන් පැහැති මැගසින් 02ක්, 9mm පිස්තෝලයක්, අත්බෝම්බයක් සහ T-56 උණ්ඩ 115ක් හමුවීමේ සිද්ධිය සම්බන්ධයෙන් ඔහුව ඔක්තෝබර් 01 වනදා දක්වා රක්ෂිත බන්ධනාගර ගත කරන ලෙස ද වලස්මුල්ල මහෙස්ත්‍රාත් අධිකරණය නියෝග කර ඇත.
මිද්දෙණිය ප්‍රදේශයේදී අයිස් මත්ද්‍රව්‍ය නිපදවීමට යොදාගන්නා බවට සැක කෙරෙන රසායනික ද්‍රව්‍ය අඩංගු කන්ටේනර් දෙකක් සඟවා තිබියදී සොයාගැනීමේ සිද්ධිය සම්බන්ධයෙන් අත්අඩංගුවට ගැනීමට සොයමින් සිටියදී සම්පත් මනම්පේරි පසුගිය 17 වනදා අධිකරණයට භාරවී තිබුණු අතර ඔහුව පොලිස් මත්ද්‍රව්‍ය නාශක කාර්යාංශය භාරයේ දින 07ක කාලයක් රඳවා ප්‍රශ්න කිරීමට වලස්මුල්ල මහෙස්ත්‍රාත් මල්ෂා කොඩිතුවක්කු මෙනෙවිය අවසර ලබාදී තිබිණි.
