කොළඹ LNW: රට පුරා රෝහල්වල ඉන්සියුලින් හිඟයක් පවතින බවට පළව තිබෙන පුවත් පත් වාර්තාව සම්පූර්ණයෙන් අසත්‍ය බව සෞඛ්‍ය හා ජනමාධ්‍ය අමත්‍ය වෛද්‍ය නලින්ද ජයතිස්ස මහතා අවධාරණය කළේය.
අදාළ මාධ්‍යවේදියාට එක් රජයේ රෝහලකදී ලද යම් අත්දැකීමක් මත වෛද්‍ය සැපයුම් අංශයෙන් හෝ කිසිදු විමසීමක් නොකර රට පුරා ඉන්සියුලින් හිඟයක් ඇති බවට පුවතක් පළකර ඇති බවයි අමාත්‍යවරයා සඳහන් කළේ.
ඒ අනුව ඉදිරි සති තුනකට අවශ්‍ය වන ඉන්සියුලින් වෛද්‍ය සැපයුම් අංශය ඇතුළු ආයතන සතුව ඇති අතර ඔක්තෝම්බර් මුල් සතිය වන විට ඉදිරි මාස එකහමාරකට සරිලන ඉන්සියුලින් තොගයක් ලැබෙන බවත් ඔක්තෝම්බර් මාසය අවසන් වන විට තවත් මාස හතරකට සරිලන ඉන්සියුලින් ලැබෙන බව ද අමාත්‍යවරයා ප්‍රකාශ කරන ලදී.
මේ අතර ඖෂධ සැපයුම් ක්‍රියාවලියේදී රජයේ පාර්ශවයෙන් අවශ්‍ය ක්‍රියාවලිය සම්පූර්ණ කර තිබියදීත් සැපයුම්කරුවන්ගේ පාර්ශවයෙන් ගැටළු මතුවන බවද අමාත්‍යවරයා පැවසුවේය. කෙසේවෙතත් රජයේ පිරිවිතරයන් අනුව සහතික කරන ලද ගුණත්වයෙන් යුතු ඖෂධ පමණක් පිළිගන්නා අතර සැපයුම්කරුවන්ගේ අවශ්‍යතාව පරිදි ඊට වඩා අඩු ගුණත්වයෙන් යුතු ඖෂධ පිළිගැනීමට රජය කිසිසේත් කටයුතු නොකරන බවද නලින්ද ජයතිස්ස මහතා අවධාරණය කළේය.
සෞඛ්‍ය සම්බන්ධයෙන් රජයේ ප්‍රධාන අභියෝගය වී තිබෙන්නේ ගුණාත්මක තත්ත්වයෙන් ඉහළ ඖෂධ රජයේ රෝහල් තුළ නොමිලයේත් ඉන් පිටත මිල පාලනයක් සහිතව සහනදායි මිලට අඛණ්ඩව ලබා දීම බවද අමාත්‍යවරයා කියාසිටියේය.
මෙම කාරණය සැලකිය යුතු ලෙස නිරාකරණය කරගැනීමටද මේ වන විට හැකිවෙමින් පවතින බවද අමාත්‍යවරයා සඳහන් කරන ලදී.
යම්කිසි අයුරකින් අද දවසේදී යම් ඖෂධ හිඟයක් පවතින්නේ නම් එය සිදුව ඇත්තේ පසුගිය වසරේ නියමිත කාලවලදී නියමිත ඇනවුම් නොකිරීමේ ප්‍රතිඵලයක් ලෙස යැයි ද අමාත්‍යවරයා තවදුරටත් ප්‍රකාශ කළේය.
අමාත්‍යවරයා මෙම අදහස් පළකළේ ඊයේ (25) කොළඹ වෛද්‍ය පීඨ ශ්‍රවණාගාරයේ පැවති ලෝක ඖෂධවේදීන්ගේ දිනය නිමිත්තෙන් රජයේ ඖෂධවේදීන්ගේ සංගමය සංවිධානය කළ වැඩසටහනට එක්වෙමිනි.
ආශිකා බ්‍රාහ්මණ
