රෂිකා හෙන්නායක ඔක්තෝබර් 02, කොළඹ LNW :
මෙරට විදේශ විනිමය ආදායම තවදුරටත් ඉහළ යමින් මේ වසරේ මුල් මාස 8ක කාලයේදී සමස්ත අපනයන ආදායම රුපියල් කෝටි 417,000ක් (අමෙරිකානු ඩොලර් බිලියන 13.9) දක්වා ඉහළ ගොස් තිබෙන බව ශ්රී ලංකා මහ බැංකුව පෙන්වා දෙයි.
ශ්රී ලංකා මහ බැංකුව නිකුත් කළ නවතම වාර්තාවෙන් පෙන්වා දෙන්නේ , ඒ අනුව භාණ්ඩ අපනයන ආදායම රුපියල් කෝටි 273,000ක් (අමෙරිකානු ඩොලර් බිලියන 9.1) වන අතර සේවා අපනයන ආදායම රුපියල් කෝටි 144,000 (ඩොලර් බිලියන 4.8) දක්වා ඉහළ ගොස් තිබෙන බවයි.
මේ වසරේ අපනයන ආදායම පසුගිය 2024 වසරේ මුල් මාස අටක කාලයට සාපේක්ෂව සියයට 5.6%ක වර්ධනයක් පෙන්නුම් කරන බව පවසන ශ්රී ලංකා මහ බැංකුව , භාණ්ඩ අපනයන ආදායම 6.7%කින් සහ සේවා අපනයන ආදායම 3.5%කින් ඉහළ ගොස් තිබෙන බව සඳහන් කරයි.
ශ්රී ලංකා මහ බැංකුව පවසන්නේ, මේ වසරේ අගෝස්තු මාසයේදී පමණක් අමෙරිකානු ඩොලර් මිලියන 1,840ක අපනයන ආදායමක් උපයා ගැනීමට ශ්රී ලංකාව සමත්ව ඇති අතර, භාණ්ඩ අපනයන ආදායම ඩොලර් මිලියන 1,282ක් සහ සේවා අපනයන ආදායම ඩොලර් මිලියන 558ක් ඒ අතර වන බවයි.
