කොළඹ (LNW): පසුගිය වසර 3 ක කාලය තුල නීති විද්‍යාලයේ සුවිසල් දියුනුවක් ඇතිකිරීමට කටයුතු කල එහි වත්මන් විදුහල්පති ආචාර්ය අතුල පතිනායක මහතාට සේවා දිගුවක් ලබාදීම ප්‍රතික්ෂේප කිරීමට නීති අධ්‍යාපන කවුන්සිලය තීරණය කරඇති බව වාර්තා වෙයි. මේ පිලිබදව කොලඹ නීතිඥ ප්‍රජාව අතර දැඩි කතාබහක් ඇතිව තිබේ.
පැරනි ආයතනික කලමනාකරන ව්‍යුහය නවීකෘත කරමින් සහ නවීකෘත භෞතික සම්පත් රැසක් සිසුන්ට ලබා දෙමින්, කලට වෙලාවට විභාග පවත්වමින් සහ ජාත්‍යන්තර මට්ටමේ අධ්‍යාපන අවස්ථා විවර කරමින් නීති විද්‍යාලය තුල පතිනායක මහතා සිදුකරගෙන ගිය වැඩපිළිවෙළ පසුගිය කාලසීමාව තුල නීති ක්ෂේත්‍රයේ මෙන්ම මෙරට අධ්‍යාපන ක්ෂේත්‍රයේද නොමද පැසසුමට ලක්විය.
පසුගිය කාල සීමාව පුරාවටම පතිනායක මහතාට එරෙහිව නිර්නාමික චෝදනා සහ මඩ ප්‍රහාර රාශියක් එල්ල වූ අතර පසුව ඒවායේ අසත්‍යතාවය හෙළිදරව් වීමෙන් එම චෝදනා යටපත් විය.
මේ පිළිබඳව වත්මන් අධිකරණ ඇමතිනී අග්‍රාමාත්‍ය ආචාර්ය හරිනි අමරසූරිය මහත්මිය කිසිදු ආකාරයකින් දැනුවත් කිරීමට නීති අධ්‍යාපන කවුන්සිලයේ අමාත්‍යවරයාගේ නියෝජිතයින් 6 දෙනා ලෙස කටයුතු කරන නීතිඥවරුන් ක්‍රියා කර නොමැති බවත්, එමෙන්ම අදාල තීරණය ගැනිම සඳහා අධිකරණ අමාත්‍යාංශ ලේකම්වරයා පවා සහභාගී වී නොමැති බවත් අප රජය පාර්ශවයෙන් කල විමසීමකදී දැනගැනීමට ලැබිණි.
මෙම තීරණය නීති විද්‍යාලයේ උන්නතිය අපේක්ෂා කරන නීතිඥවරුන් සහ නීති සිසුන් බහුතරයකගේ කණගාටුවට හේතු වී තිබේ.
