ජාතික ජන බලවේගයේ නව රජය යටතේ ආරම්භ කර ඇති දූෂණ විරෝධී වැඩසටහනේ විවිධ විමර්ශන ලිපිගොනුවල නම සඳහන්ව ඇතැයි ව්‍යාපාරිකයින් බිය වද්දමින් කප්පම් ගන්නා කල්ලියක් පිළිබඳ තොරතුරු අනාවරණය වී ඇති බව වාර්තා වේ.
නව රජය දැඩි දූෂණ විරෝධී ප්‍රතිපත්තියක් අනුගමනය කරන බැවින් ලිපිගොනුවල නම සඳහන්ව තිබීමෙන් ඉදිරියේදී බරපතළ ගැටලු ඇතිවිය හැකි බවට ව්‍යාපාරිකයින් බියවද්දා එම ලිපිගොනුවලින් නම ඉවත් කරදීම සඳහා මෙසේ කප්පම් ඉල්ලන බවටයි ආරක්ෂක අංශ වෙත තොරතුරු ලැබී ඇත්තේ.
මීට රජයේ හෝ රජයට සම්බන්ධ බලධාරීන්ගේ කිසිදු සම්බන්ධයක් නොමැති අතර පාතාලය හා සබඳතා ඇති අයවලුන් සහ විවිධ කූඨ ගනුදෙනුවල නියැළෙන පිරිසක් එක්ව මෙම ජාවාරම පවත්වාගෙන යන බව සඳහන්.
එසේම, මුදල් ඉපයීමේ අරමුණ මෙන්ම රජය අපහසුතාවට පත්කිරීමේ අරමුණින් ද යුතුව ඔවුන් මෙම ජාවාරමේ නිරත වන බවට තොරතුරු අනාවරණය වී ඇතැයි පැවසේ.
ඒ අනුව, මේ සම්බන්ධයෙන් මේ වනවිටත් බුද්ධි අංශ විමර්ශනයක් ආරම්භ කර ඇති බවත් ආරංචිමාර්ග පැවසීය.
RN
