සටහන – රුවන් නෙළුගොල්ල
බඩඉරිඟු මිල ඇතුළු දැනට පවතින තත්වයන් අනුව බිත්තරයක මිල රුපියල් 36 – 37 වැනි අගයක පවත්වා නොගතහොත් එය බිත්තර නිෂ්පාදන කර්මාන්තයට අහිතකර බලපෑමක් එල්ල කරන බව කෘෂිකර්ම අමාත්‍යාංශය පවසයි.
ඒ අනුව, කුකුළු කෑම සඳහා යන වියදම අඩුකිරීමට කටයුතු කරමින් සිටින අතර එම කටයුතු සම්පූර්ණ වීමෙන් පසු ඉදිරියේදී බිත්තරයක මිල රුපියල් 20 – 30 වැනි අගයකට පැමිණෙනු ඇති බවයි කෘෂිකර්ම අමාත්‍යාංශ ලේකම් එම්. පී. නිශාන්ත වික්‍රමසිංහ මහතා සඳහන් කළේ.
“කොහොමත් මේ වනවිට බිත්තරයක් නිෂ්පාදනය කරන්න රුපියල් 32ක 33 ක වගේ වියදමක් යනවා. මේ වියදමෙන් වැඩි කොටසක් තියෙන්නේ කුකුල් කෑම. 80%ක් පමණ රඳා පවතින්නේ බඩඉරිගු මිල මත. බඩඉරිගු මිල තීරණය වීමේ යම් යම් ගැටලුකාරි තත්ත්වයක් තියෙනවා. ඒ ටික විසඳීමට අපි මේ දවස්වල කටයුතු කරමින් පවතිනවා. කොහොමත් බිත්තරයක් වෙළෙඳපොළේ රුපියල් 36 ක 37ක මිලකට තිබුණේ නැතිනම් කුකුල් කර්මාන්තෙට මේක බලපානවා. ඉදිරියේ දී කුකුල් කෑම සඳහා යන නිෂ්පාදන වියදම, විශේෂයෙන් බඩඉරිඟු සඳහා යන වියදම 165ක් පමණ වෙනවා. ඒක 140කට වගේ අඩු කරන්න පුළුවන්. ඒ කටයුතු ටික කරගත්තට පස්සේ රටේ බිත්තර මිල රුපියල් 29ත් 30ත් අතර තත්ත්වයකට පැමිණෙයි”
කෘෂිකර්ම අමාත්‍යාංශ ලේකම්වරයා මේ බව පැවසුවේ ඊයේ (06) පැවති මාධ්‍ය හමුවක් අමතමිනි.
