රෂිකා හෙන්නායක ඔක්තෝබර් 08, ලෝකය (අවුට්බවුන්ඩ් ටුඩේ):
ඉන්දියාවේ බිලාස්පූර් දිස්ත්‍රික්කයේ හිමාචල් ප්‍රදේශයේ සිදුවූ දැවැන්ත නාය යාමකට හසුවූ බස් රථයක සිටි පුද්ගලයින් 18 දෙනෙකු ජීවිතක්ෂයට පත්ව ඇති බව වාර්තා වේ.
එම අනතුර සිදුවන අවස්ථාවේ බස් රථයේ මගීන් 30ත් 35ත් අතර පිරිසක් සිට ඇති බවට වාර්තා පළ වේ.
මෙම අනතුරින් මේ දක්වා දිවි බේරා ගැනීමට හැකි වී ඇත්තේ තිදෙනෙකුගේ පමණයි. ඉන්දීය බලධාරීන් අනතුරු අඟවා ඇත්තේ, සිද්ධියෙන් මියගිය පුද්ගලයින්ගේ සංඛ්‍යාව තවදුරටත් ඉහළ යා හැකි බවටයි.
ඉන්දීය මාධ්‍ය වාර්තා කළේ, මෙම බස් රථය හර්යානාවේ රොහ්ටැල් සිට ගුමර්වින් ප්‍රදේශය දක්වා ගමන් කරමින් සිටියදී මෙම අනතුරට ලක්ව තිබෙන අතර, මාර්ගයේ ගමන් ගනිමින් තිබූ එම බස් රථය මතට එක්වරම කන්දක් කඩා වැටී බස් රථය එයට යටවී ඇති බවයි .
අනතුරට පත්වූ බස් රථයේ පිරිස් මුදා ගැනීම සඳහා දැවැන්ත මෙහෙයුමක් ද දියත් කෙරුණ අතර, මියගිය අයගේ පවුල්වලට රුපියල් ලක්ෂ 02ක වන්දියක් සහ තුවාල ලැබූවන්ට රුපියල් 50,000ක වන්දියක් ලබාදෙන බව, ඉන්දීය අග්‍රාමාත්‍ය නරේන්ද්‍ර මෝදි පවසා ඇත.
