රෂිකා හෙන්නායක ඔක්තෝබර් 17, කොළඹ LNW :
ඉන්දියාවේ සිට මුහුදු මාර්ගයෙන් ශ්‍රී ලංකාවට මහා පරිමාණයෙන් මත්ද්‍රව්‍ය ජාවාරම් කිරීමේ ජාලයක් හෙළිදරව් කරමින්, ඉන්දීය බුද්ධි අංශ විසින් පුද්ගලයන් සිව්දෙනෙකු අත්අඩංගුවට ගෙන ඇත.
මෙම ජාවාරමේ ප්‍රධාන සැකකරු ලෙස සැලකෙන්නේ තමිළග වෙට්ට්‍රි කලගම් පක්ෂයේ නාගපතිනම් දිස්ත්‍රික් විධායක කමිටු සාමාජිකයෙකු වන එන්. භූපාලන් නම් ක්‍රියාකාරිකයාය.
ආරක්ෂක අංශ විසින් සිදුකළ වැටලීම්වලදී මොවුන් සතුව තිබී මෙටම්පෙටමින් කිලෝග්‍රෑම් 100ක තොගයක් සොයාගෙන ඇති අතර, සැකකරුගේ ශ්‍රී ලංකා ජාතික භාර්යාවද මෙම ජාවාරමට සම්බන්ධ වන්නට ඇති බවට සැක කෙරේ.
චෙන්නායි සිට රැගෙන ආ මෙම තොගය තමිල්නාඩුව පුරා බෙදාහැරීමට සූදානම් කර තිබී ඇත.
මේ අතර, පක්ෂ ප්‍රතිපත්ති උල්ලංඝනය කිරීම සහ මත්ද්‍රව්‍ය ජාවාරමට සම්බන්ධ වීම නිසා භූපාලන් පක්ෂයේ සියලු තනතුරුවලින් වහාම ඉවත් කර තිබේ.
අත්අඩංගුවට ගත් සැකකරුවන් සහ නීතිවිරෝධී මත්ද්‍රව්‍ය තොගය වැඩිදුර පරීක්ෂණ කටයුතු සඳහා නාගපතිනම් රේගු කාර්යාලය වෙත භාර දී ඇත.
