සටහන: සශිකලා මධුෂාණී
ලෝකය(අවුට්බවුන්ඩ් ටුඩේ) ඔක්තෝම්බර් මස 22 : අන්තර්ජාලයේ වෙබ් අඩවි විශාල සංඛ්‍යාවක් පවත්වාගෙන යාම සඳහා භාවිත කරන PHP පරිගණක භාෂාවේ හඳුනාගත් බරපතළ ආරක්ෂක දුර්වලතා දෙකක් හේතුවෙන් ලොව පුරා වෙබ් අඩවි රැසක් තාවකාලිකව අක්‍රිය කිරීමට පියවර ගෙන තිබේ.
මෙම ආරක්ෂක අවදානම සම්බන්ධයෙන් ජාත්‍යන්තර සයිබර් ආරක්ෂක ආයතන අනතුරු ඇඟවීම් නිකුත් කර ඇති අතර, අදාළ ආරක්ෂක යාවත්කාලීන කිරීම් කඩිනමින් ස්ථාපනය කිරීමට නොහැකි ආයතනවලට සිය වෙබ් අඩවි තාවකාලිකව අක්‍රිය කරන ලෙස උපදෙස් දී ඇත.
ඒ අනූව, ෆින්ලන්තය, නෙදර්ලන්තය ඇතුළු යුරෝපීය රටවල රාජ්‍ය වෙබ් සේවා කිහිපයක් ආරක්ෂක පියවරක් ලෙස තාවකාලිකව අක්‍රිය කර ඇති අතර විකිපීඩියා පවත්වාගෙන යන විකිමීඩියා පදනම ද සිය පද්ධති කිහිපයක් ආරක්ෂිතව යාවත්කාලීන කරන තෙක් තාවකාලිකව අක්‍රිය කළ බව සඳහන් කර ඇත.
විශේෂඥයන් පෙන්වා දෙන්නේ මෙම ආරක්ෂක දුර්වලතා මඟින් ඇතැම් අවස්ථාවලදී ප්‍රහාරකයන්ට පද්ධති වෙත අනවසරයෙන් ඇතුළු වී කේත ක්‍රියාත්මක කිරීමටත්, සේවාදායක පද්ධති සහ දත්ත වෙත ප්‍රවේශ වීමටත් අවස්ථාව සැලසිය හැකි හෙයින් මෙම සිදුවීම අන්තර්ජාල සේවා පවත්වාගෙන යාමේදී සයිබර් ආරක්ෂාවට ප්‍රමුඛත්වය දීමේ අවශ්‍යතාව යළිත් අවධාරණය කරන අතර, වෙබ් අඩවි සහ දත්ත පද්ධති ආරක්ෂා කිරීම සඳහා ජාත්‍යන්තර මට්ටමේ කඩිනම් ක්‍රියාමාර්ග ගැනීමේ වැදගත්කම ද ඉස්මතු කරන බවයි.
