සටහන – රුවන් නෙළුගොල්ල
හිටපු අමාත්‍ය ජොන්ස්ටන් ප්‍රනාන්දු අත් අඩංගුවට ගෙන අධිකරණයට ඉදිරිපත් කරන ලෙස කොළඹ මහාධිකරණය අද (ඔක්තෝබර් 23) වරෙන්තු නිකුත් කළේය.
ඒ, ජොන්ස්ටන් ප්‍රනාන්දු වෙළඳ අමාත්‍යවරයාව සිටි සමයේදී සතොස ආයතනයේ සේවකයින් පිරිසක් රාජකාරිවලින් ඉවත් කර දේශපාලන ක්‍රියාකාරකම්වල යෙදවීමෙන් රජයට පාඩු කිරීම සම්බන්ධයෙන් ගොනුකර ඇති නඩුව අද කැඳවූ අවස්ථාවේදී අධිකරණය හමුවේ පෙනී නොසිටි නිසා ය.
එම නඩුව අද කොළඹ මහාධිකරණ විනිසුරු මංජුල තිලකරත්න මහතා හමුවේ කැඳවූ අවස්ථාවේදී නඩුවේ සෙසු විත්තිකරුවන් දෙදෙනා අධිකරණය හමුවේ පෙනී සිටි නමුත් පළමුවැනි විත්තිකාර ජොන්ස්ටන් ප්‍රනාන්දු අධිකරණය හමුවේ පෙනී සිටියේ නැත.
ඔහු වෙනුවෙන් පෙනී සිටි නීතීඥවරයා අධිකරණයට දන්වා සිටියේ අභියාචනාධිකරණයට ඊයේ (22) දිනයේ ලබාදුන් පොරොන්දුවක් අනුව තම සේවාදායකයා අද දිනයේදී අපරාධ පරීක්ෂණ දෙපාර්තමේන්තුවට ප්‍රකාශයක් ලබාදීම සඳහා ගොස් ඇති බවයි.
එම ප්‍රකාශය දැඩි ලෙස දෝෂාරෝපණයට ලක් කළ විනිසුරුවරයා පෙන්වා දුන්නේ විත්තිකරු නඩුවට ප්‍රමුඛතාවය දිය යුතු බවත් ඔහු නඩුවට පැමිණීම වළක්වාලන කිසිදු නියෝගයක් අභියාචනාධිකරණය විසින් නිකුත් කර නොමැති බවත් ය.
ඒ අනුව අල්ලස් කොමිසම වෙනුවෙන් පෙනී සිටි නියෝජ්‍ය සොලිසිටර් ජනරාල්වරයා කළ ඉල්ලීමක් සලකා බලමින් ජොන්ස්ටන් ප්‍රනාන්දු අත් අඩංගුවට ගෙන අධිකරණයට ඉදිරිපත් කරන ලෙස විනිසුරුවරයා විසින් වරෙන්තු නිකුත් කරන ලදී.
නඩුව 2025 ජනවාරි 27 වනදා නැවත කැඳවීමට නියමිත ය.
