කොළඹ LNW:සමාජ,සංස්කෘතික,ආර්ථික යන සෑම අතකින්ම රට පරිවර්තනය කිරීමට නොවැම්බර් 14 වැනිදා ජාති,ආගම් භේද නොසලකා එකමුතු විය යුතු බව ජාතික ජන බලවේගයේ බදුල්ල දිස්ත්‍රික් අපේක්ෂිකා අම්භිකා සැමුවෙල් මෙනෙවිය අවධාරණය කරයි.
වසර 76ක් පුරා පාලනය කළ පාලකයින් ජාතිවාදය,ආගම්භේදය පතුරුවමින් පාලනය ගෙන ගිය අතර තවදුරටත් ජනතාව දුප්පතුන් ලෙස සිටින බවයි ඇය සඳහන් කළේ.
” මගේ දෙමව්පියනි,සහෝදර සහෝදරියනි,අපි ජය අරගෙන තිබෙනවා. ඒ ජය කරන කොටගෙන අපි එකමුතුව අපේ සියලු ජාතීන් සිංහල,දෙමළ,මුස්ලිම් සියලු ජාතීන් ඒවගේම සියලු ආගම්වල සියලු දෙනාද එකමුතුවෙලා අපි එකම පරමාර්ථයෙන් අපේ රට ගොඩනගන ඒ ශ්‍රමදනයට අපි එකමුතුවෙමු කියන පණිවිඩය තමයි මම ඔබ සියලු දෙනාට දෙන්නේ. අවුරුදු 76ක් තිස්සේ අපිව පාලනය කරපු පාලකයින් අපිව වෙන්කරමින් ජාතිවාදය ඒ වගේම ආගම භේදය පතුරුවමින් අපේ දේශය පාලනය කළා. අපව තාමත් දිළිඳුභාවයට පත්කර තිබෙනවා.. එය අවසන් කරමින් ජාතික ජන බලවේගයේ සෙවණට අපි ඔක්කොම එකතුවෙලා අපි රට ගොඩනගන්න යන්නේ අපි එකමුතුභාවයෙන්. ඒ එකමුතුභාවයේ බලය අපි පෙන්වන්න යන්නේ නොවැම්බර් 14 වැනිදා. ඒ නිසා මගේ දෙමව්පියනි, මගේ සහෝදර සහෝදරියනි අපිට ලොකු වගකීමක් තියෙනවා. මේ දේශපාලනය පරිවර්තනය කරන කොටගෙන අපේ සමාජය,සංස්කෘතික, ඒවගේම ආර්ථික ලෙස සියලු ආකාරයෙන්ම පරිවර්තනයට යොමුකරමින් නව පුනරුදයකට අපි පාතබන්න වෙනවා. ඒකට අපි ඔක්කොම එකමුතු විය යුතුයි. ඒ වගේම අපේ රට ගොඩනගන්න නිෂ්පාදන ආර්ථිකයට අත්වැල් බැඳ ගනිමින් ඒක ගොඩනගමින් අපේ රට ඉතා ඉක්මණින්ම ගොඩනගමු කියන පණිවිඩය මම කියා තබනවා.” යනුවෙන් ඇය තවදුරටත් අවධාරණය කළාය.
ඇය මෙම අදහස් දක්වා සිටියේ ඊයේ (03) ජාතික ජන බලවේගයේ බදුල්ල දිස්ත්‍රික් මහජන රැළිය අමතමිනි.
ආශිකා බ්‍රාහ්මණ
