කොළඹ LNW:සෞදි අරාබියේ මදීනා නගරයට ආසන්නයේදි උම්රා වන්දනාකරුවන් රැගත් බස් රථයක් සහ ඩීසල් තෙල් රැගත් බවුසරයක් එකිනෙක ගැටීමෙන් ඇතිවූ ගින්නට හසුව පුද්ගලයින් 42දෙනෙකු ජීවිතක්ෂයට පත්ව ඇතැයි විදෙස් වාර්තා පවසයි.
එලෙස මියගොස් ඇත්තේ ඉන්දීය වන්දනාකරුවන් පිරිසක් බව වාර්තා වන අතර මෙම කණ්ඩායම තම චාරිත්‍ර ඉටු කිරීමෙන් පසු මක්කම සිට ආපසු යමින් සිටියදී අනතුර සිදුව ඇති බවයි විදෙස් පුවත් වාර්තා කර ඇත්තේ.
අනතුර සිදුවන විට බොහෝ මගීන් නිදාගෙන සිටි අතර ගැටීමෙන් පසු බස් රථය ගිනි ගන්නා විට ඔවුන්ට පැන යාමට ඇති ඉඩකඩ ඇහිරී ඇති බව සඳහන්.
විපතට පත්වූවන් අතර අවම වශයෙන් කාන්තාවන් 11 දෙනෙකු සහ දරුවන් 10 දෙනෙකු සිටින බව වාර්තා වෙයි. අනතුරින් බස් රථය සම්පූර්ණයෙන්ම ගිනිගෙන විනාශ වී ඇති හෙයින් අනතුරට පත්වූවන් හඳුනා ගැනීමද අතිශයින් අභියෝගාත්මක බවද දැක්වෙයි.
මෙම අනතුරින් එක් පුද්ගලයෙක් දිවි ගැලව ගෙන ඇති අතර තුවාල ලබා ඇති එම පුද්ගලයා රෝහල් ගත කර ඇති බවයි විදෙස් වාර්තා පවසන්නේ.
ආශිකා බ්‍රාහ්මණ
