සටහන: සශිකලා මධුෂාණි
නොවැම්බර් 23: ලෝකය(අවුට්බවුන්ඩ් ටුඩේ) : වියට්නාමයට දින ගණනක් පුරා ඇදහැලෙන අධික වර්ෂාව නිසා ඇති වූ ගංවතුර හා නායයාම් හේතුවෙන් පුද්ගලයන් 90 දෙනෙකු මියගොස් 12 දෙනෙකු අතුරුදන්ව ඇති බව වාර්තා වේ.
රට පුරා නිවාස 186,000 කට හානි සිදුවී ඇති අතර පශු සම්පත් මිලියන තුනකට වඩා ගසාගෙන ගොස් තිබේ. මේ සම්බන්ධයෙන් වියට්නාම රජය ඇස්තමේන්තු කරන්නේ පවුම් මිලියන සිය ගණනක හානියක් සිදුවී ඇති බවයි.
දැඩි ලෙස පීඩාවට පත්ව ඇති දකුණු සහ දකුණු-මධ්යම වියට්නාමයේ පොකුරු වශයෙන් පිහිටා ඇති ක්වාං න්ගයි, ගියා ලායි, ඩැක් ලක්, ඛාන් හෝවා සහ ලැම් ඩොං යන පළාත් වෙනුවෙන් රජය හමුදා සහ පොලිසිය බලමුළු ගන්වා ඇති අතර මෙම වසරේ ජනවාරි සහ ඔක්තෝබර් අතර, අයහපත් කාලගුණය හේතුවෙන් වියට්නාමයේ පුද්ගලයින් 279 දෙනෙකු මිය ගොස් හෝ අතුරුදහන් වී ඇති අතර ඩොලර් බිලියන 2 කට වඩා හානියක් සිදුවී ඇත.
පසුගියදා වියට්නාමයට බලපෑ කල්මේගි සහ බුවාලෝයි යන සුළි කුණාටු වලින් පසු එරටට බලපෑ නවතම ආන්තික කාලගුණික සිදුවීම මෙයයි.
