සටහන – රෂිකා හෙන්නායක
කොළඹ (LNW): මෙරට මත් පැන් බෝතල්වල අලවන ව්‍යාජ ස්ටිකර් පරීක්ෂා කිරීමට ගැනීමෙන් පසු සුරාබදු දෙපාර්තමේන්තුවේ මාසික ආදායම රුපියල් බිලියනයකින් වැඩිවී ඇති බව හෙළි වී ඇත.
ඒ එම දෙපාර්තමේන්තුවේ නිලධාරීන් ජාතික ආර්ථිකය හා භෞතික සැලසුම් පිළිබඳ ආංශික අධීක්ෂණ කාරක සභාවට එම තොරතුරු අනාවරණය කිරීමත් සමඟයි.
මෙම තොරතුරු අනාවරණය වූයේ ජාතික ආර්ථිකය හා භෞතික සැලසුම් පිළිබඳ ආංශික අධීක්ෂණ කාරක සභාව පාර්ලිමේන්තු මන්ත්‍රී මහින්දානන්ද අලුත්ගමගේ මහතාගේ සභාපතිත්වයෙන් පසුගියදා පාර්ලිමේන්තුවේදී රැස් වූ අවස්ථාවේදීය.
මෙහිදී ජාතික ආර්ථිකය හා භෞතික සැලසුම් පිළිබඳ ආංශික අධීක්ෂණ කාරක සභාව විසින් ජනාධිපතිවරයාට ලබාදුන් වාර්තාවේ සඳහන් කරුණු පිළිබඳ සාකච්ඡා කිරීමට සුරාබදු දෙපාර්තමේන්තුව, දේශීය ආදායම් දෙපාර්තමේන්තුව සහ ශ්‍රී ලංකා රේගුව මෙම කාරක සභාවට කැඳවා තිබුණි.
මේ අනුව සුරාබදු පනත සංශෝධනය සම්බන්ධයෙන්ද මෙහිදී කමිටුව විමසන ලදි. එසේම සුරාබදු දෙපාර්තමේන්තුව මේ වන විට වැඩි කරගෙන ඇති ආදායම පවත්වාගෙන යාමේ අවශ්‍යතාව සහ අහඹු ලෙස වැටලීම් ඉදිරියටද කරගෙන යාම ව්‍යාජ ස්ටිකර් මත් පැන් බෝතල්වල ඇළවීම තවදුරටත් අවම කිරීමට හේතු වන බවද මෙහිදී කමිටුව පෙන්වා දුන්නේය.
එසේම RAMIS පද්ධතියේ වර්තමාන ක්‍රියාකාරීත්වය පිළිබඳව දේශීය ආදායම් දෙපාර්තමේන්තුවෙන් විමසීමද මෙහිදී සිදු විය.
මේ අනුව මෙම දත්ත පද්ධතිය අනෙකුත් රාජ්‍ය ආයතන සමග සම්බන්ධ කිරීමේ වර්තමාන තත්ත්වය පිළිබඳවද මෙහිදී කමිටුව විසින් පරීක්ෂා කරන ලදි. මේ අනුව පවතින අඩුපාඩු මගහරිමින් 2024 ජනවාරි මස වන විට මෙම දත්ත පද්ධතිය ක්‍රියාකාරී තත්ත්වයට පත් කරන බව පැමිණි නිලධාරීන් සඳහන් කළේය.
තවද බදු ලිපිගොනු සංඛ්‍යාව දැනට ලක්ෂ 7 පමණ වන බවත් එය ඉදිරියේදී ලක්ෂ 10 දක්වා වැඩිකිරීමට බලාපොරොත්තු වන බවත් දේශීය ආදායම් දෙපාර්තමේන්තුව මෙහිදී පවසන ලදි.
මීට අමතරව ආදායම් බදු නිවැරදිව ගෙවන පාර්ශ්ව ඇගයීමේ ක්‍රමවේදයක් සකස් කිරීම කෙරෙහි අවධානය යොමු කරන ලෙසද කමිටුව විසින් නිලධාරීන්ට උපදෙස් ලබා දෙනු ලැබීය.
තවද රේගුව සම්බන්ධ නීති සංශෝධනය කිරීම මගින් අපේක්ෂිත බදු ආදායම ඉක්මවූ බදු ප්‍රමාණයකට රේගුවට ලගා විය හැකි බවද මෙහිදී කමිටුව පෙන්වා දී ඇති අතර එසේම රේගුව විසින් අය කළ යුතු බදු අය කර ගැනීම වෙනුවෙන් ගන්නා පියවර පිළිබඳවද මෙහිදී දීර්ඝ වශයෙන් සාකච්ඡා කර ඇත.
මෙම කාරක සභාව සඳහා පාර්ලිමේන්තු මන්ත්‍රීවරුන් වන අශෝක් අබේසිංහ, සුදත් මංජුල හා කාරක සභා සාමාජිකයින් නොවන මන්ත්‍රීවරුන් වන ජේ.සී. අලවතුවල, සහ (මේජර්) සුදර්ශන දෙණිපිටිය යන මහත්වරු සහභාගී වූහ.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??
