හිටපු සංචාරක සහ ක්‍රීඩා අමාත්‍ය හරීන් ප්‍රනාන්දු සාදයක් අතරතුර බීමතින් ගැටුමක් ඇතිකරගෙන කලහකාරී ලෙස හැසිරෙන ආකාරය දැක්වෙන වීඩියෝවක් “ඩේලි මිරර්” විසින් ෆේස්බුක් සමාජ මාධ්‍ය ජාලයෙහි පළකර තිබේ.
ඔහු CH & FC ක්‍රීඩා සමාජයේදී මෙසේ කලහකාරී ලෙස හැසිරෙමින් අසභ්‍ය වචනයෙන් බැනවැදී ඇති අතර එම අවස්ථාවේ එහි සිටි පිරිසක් ඔහුට “හූ” කියමින් ප්‍රතිචාර දක්වා ඇත.
අවට සිටි අය තත්වය පාලනය කරගෙන හරීන් ප්‍රනාන්දු හිටපු අමාත්‍යවරයාව එම ස්ථානයෙන් ඉවතට ගෙන යාමට පියවර ගෙන ඇති බව සඳහන්.
හරීන් ප්‍රනාන්දු සමකාලීන බොහෝ දේශපාලනඥයින්ට සාපේක්ෂව කෙටි කාලයක් තුළ වේගවත් දේශපාලන ගමනක් පැමිණි අයෙකි. ඒ වේගවත් දේශපාලන ගමන තුළ ඔහු නොයෙකුත් ගැටුම් ද ඇතිකර ගත්තේ ය. කලක් විපක්ෂයේ දේශපාලන තරුවක්ව සිටි ඔහු තමන් විසින්ම පතුරු ඇරිය ගෝඨාභය රාජපක්ෂ ජනාධිපතිවරයා අතින්ම ඇමතිකමක් ද ලබාගනිමින් රනිල් වික්‍රමසිංහ ආණ්ඩුවට ද එකතු වූයේය. ඒ, තම දේශපාලන ගමනේ අවසානය ද තමන් අතින්ම ලියා ගනිමිනි.
පසුගිය මහමැතිවරණය ආසන්නයේද හරීන් ප්‍රනාන්දු බදුල්ල නගර මධ්‍යයේ මහදවල් කමිසයත් ගලවාගෙන පොලිස් නිලධාරීන් සමග ගැටුමක් ඇතිකරගෙන සිටින ආකාරය මාධ්‍ය වාර්තා කර තිබිණි.
දේශපාලනයෙන් ඉවතටම වැටුණු පසු හරීන් තමන්ට සුපුරුදු “කචල් දාගැනීමේ” සෙල්ලම ඉදිරියටම කරගෙන යන ආකාරයක් දක්නට ලැබේ.
හරීන් ගැන හොඳටම දන්නා, කලක් ඔහු සමග වැඩ කළ අය පවා දැන් නම් කියන්නේ හරීන්ලා සජිත් ප්‍රේමදාසගේ පක්ෂයෙන් ඉවත්ව ගියේ සජිත්ගේම හොඳ වේලාවට බවකි.
