ඇමරිකානු ඩොලරයට සාපේක්ෂව රුපියල අවප්‍රමාණය වීමට ඉඩ නොදී ස්ථාවර මට්ටමක තබා ගනිද්දී රුපියල පා කරන්නැයි ප්‍රකාශ කළ විරුද්ධ පක්ෂය, දැන රුපියල පාවීමට ඉඩ හැර තිබියදී බඩුමිල ඉහළ යන බව පවසමින් චෝදනා එල්ල කරන බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ඩිලාන් පෙරේරා මහතා පවසනවා.
සියලු ගැටලු මතුව තිබෙන්නේ ඩොලර් අර්බුදය හේතුවෙන් බව පෙන්වා දෙන ඩිලාන් පෙරේරා මන්ත්‍රීවරයා පවසන්නේ සියලු දෙනා එම තත්වය අවබෝධ කරගත යුතු බවයි. මුහුණ දී සිටින ආර්ථික අර්බුදයෙන් ගොඩ ඒම සඳහා ජාත්‍යන්තර මුල්‍ය අරමුදල හමුවට යාම ඉතා නිවැරදි බවත්, ප්‍රමාද වී හෝ එම තීරණය ගැනීමට ආණ්ඩුව කටයුතු කිරීම හොඳ දෙයක් බවත් මන්ත්‍රීවරයා පවසයි.
ආණ්ඩුව තුළ තිබෙන වැරදි, අර්බුද හඳුනාගෙන රට ගොඩනගමින් ඉදිරියට යාමට ආණ්ඩුවට තවමත් අවස්ථාව තිබෙන බවත්, 1977 සහ 2015 සිදු වූ සිදුවීම් මතකයේ තබාගෙන තීන්දු තීරණ ගන්නේ නම් ආණ්ඩුවටත් රටටත් යහපත් වනු ඇති බවත් ඔහු වැඩිදුරටත් ප්‍රකාශ කරනවා.
ආණ්ඩුවක් ගෙනයෑම 20/20 හෝ එක්දින මැච් එකක් නොව ටෙස්ට් මැච් එකක් බව පෙන්වා දෙන ඩිලාන් පෙරේරා මහතා පවසන්නේ පළමු ඉනිමේදී දැක්වූ සියලු දුර්වලතා, අඩුපාඩු හඳුනාගෙන දෙවැනි ඉනිමේදී පන්දුවට පහර දෙන්නේ නම් තරගය ජයග්‍රාහීව අවසන් කළහැකි බවයි.
UN
