මඟීන් 132 රැගත් චයිනා ඊස්ටර්න් ගුවන් සමාගමට බොයිං 737 අයත් ගුවන්යානය ගුවංෂි ප්‍රාන්තයේ කඳුකර කලාපයේ කඩා වැටී තිබේ.
කුන්මිං සිට ගුවංෂෝ වෙත පියාසර කළ මෙම ගුවන්යානය ගුවංෂි කඳුකර කලාපයේ කඩා වැටී ගිනිගෙන තිබේ.
අනතුරෙන් දිවි ගලවා ගත් පුද්ගලයන් පිළිබඳ පැහැදිලි තොරතුරක් වාර්තා නොවන අතර, මිය ගිය පුද්ගලයන් පිළිබඳව ද යාවත්කාලීනයක් තවම නොමැත.
ජීවිතාරක්ෂක කණ්ඩායම් යානය කඩා වැටුණු ප්‍රදේශය වෙත යවා ඇති අතර, අදාළ කලාපයේ වනපෙදෙසේ දරුණු ගින්නක්ද මෙමඟින් හට ගෙන ඇත.
මෙම සිදුවීමේ දසුන් මේ වන විට සමාජ මාධ්‍ය ජාලා වල හුවමාරු වෙමින් පවතී.
එමෙන්ම චීනයේ සිවිල් ගුවන් සේවා පරිපාලනය ප්‍රකාශ කර ඇත්තේ සිය විමර්ශකයින් ද එම ස්ථානයට යවා ඇති බවයි.
සාමාන්‍යයෙන් චීනයේ ගුවන් සේවා ඉතා ආරක්‍ෂිත වන අතර මීට පෙර මහා ගුවන් අනතුරක් සිදුව ඇත්තේ වසර 12කට පෙරය.
එම අනතුරින් පුද්ගලයින් 42ක් මිය ගොස් ඇති බවද වාර්තා වී තිබුණි.