රෂිකා හෙන්නායක සැප්තැම්බර් 07, කොළඹ (LNW):
2024 ජනාධිපතිවරණ ඡන්ද විමසීමට අදාළ තැපැල් ඡන්ද ප්‍රතිඵල මැතිවරණ කොමිෂන් සභාව නිකුත් කිරීමට පෙර හිතුමතේ බොරු දත්ත සමාජ මාධ්‍ය ජාලාවල පළකිරීම සහ දේශපාලන වේදිකාවල ව්‍යාජ ප්‍රතිඵල සඳහන් කිරීම මැතිවරණ නීති උල්ලංඝනය කිරීමක් බව මැතිවරණ කොමසාරිස් ජනරාල් සමන් ශ්‍රී රත්නායක පැවසීය.
ව්‍යාජ ප්‍රතිඵල සමාජ මාධ්‍ය ඔස්සේ පළ කිරීම හෝ දේශපාලන වේදිකාවල තැපැල් ඡන්ද ප්‍රතිඵල සම්බන්ධව සඳහන් කිරීම රජයේ නිලධාරීන් අපහසුතාවට පත්කිරීමක් බවද ඔහු කීවේය.
මෙවැනි ව්‍යාජ ප්‍රතිඵල නිකුත් කරන පුද්ගලයන්ට විරුද්ධව නීතිමය වශයෙන් කටයුතු කිරීම සම්බන්ධවද මැතිවරණ කොමිෂන් සභාවේ අවධානය යොමුවී ඇත.
එමෙන්ම ජනාධිපතිවරණ ඡන්ද විමසීමට අදාළව මත විමසුම් කිරීමද මේ දිනවල සමාජ මාධ්‍යවල බහුලව දක්නට ලැබේ. ඒ සම්බන්ධවද මැතිවරණ කොමිෂන් සභාවේ අවධානය යොමුවී ඇත. තැපැල් ඡන්දය ප්‍රකාශ කිරීමේ කටයුතු ඉකුත් 04, 05 සහ 06 යන දිනයන්හිදී සාර්ථකව සිදුවූ බවත්, ඒ සම්බන්ධයෙන් කිසිදු සිදුවීමක් වාර්තා නොවූ බවත් මැතිවරණ කොමසාරිස් ජනරාල්වරයා කීවේය. තැපැල් ඡන්දය ප්‍රකාශ කිරීමට නොහැකිවූ රජයේ නිලධාරීන්ට මෙම 10 වැනිදා සහ 11 වැනිදා දිස්ත්‍රික් මැතිවරණ කාර්යාල තුළදී සිය ඡන්දය ප්‍රකාශ කිරීමට අවස්ථාව සලසා ඇති බවද වැඩිදුරටත් පැවසුවේය.
