කොළඹ LNW:ආසියා ශාන්තිකර කලාපයේ ආර්ථික සහයෝගීතාව හා G20 කණ්ඩායමේ සහයෝගීතාව කෙරෙහි වැඩි අවධානයක් යොමු කරන බව චීනය පවසනවා. චීන විදේශ අමාත්‍යංශයේ ප්‍රකාශිකා මාඕ නිං මහත්මිය ඊයේ (08) මේ බව පැවසුවේ බෙයිජිංහි පැවති නිත්‍ය මාධ්‍ය හමුවේදී.
චීන ජනාධිපති ෂී ජින්පිං මහතා APEC සංවිධානයේ නායකයින්ගේ නිල නොවන රැස්වීමට හා G 20 කණ්ඩායම් නායකයින්ගේ 19වන රැස්වීමට එක්වීමට නියමිත බව ද ඇය සඳහන් කළා.
ෂී ජින්පිං ජනාධිපතිවරයා APEC සංවිධානයේ නායකයින්ගේ නිල නොවන රැස්වීමට එක්වීම, චීනය ආසියා ශාන්තිකර කලාපය සම්බන්ධයෙන් සිදු කරන වැදගත් රාජ්‍යතාන්ත්‍රික මෙහෙයුමක් බව ද මාඕ නිං මහත්මිය කියා සිටියා.
G 20 නායකයින්ගේ සමුළුවේදී චීනයේ අපේක්ෂාව සම්බන්ධයෙන් ද ඇය ප්‍රකාශ කළා. සමානාත්මතා‍වයෙන් යුත්, විධිමත් බහුධ්‍රැවීය ලෝකයක් හා පොදු ප්‍රතිලාභී ආර්ථික ගෝලීයකරණයකට මුලපිරීමෙහි චීනය නිරත ව සිටින බවත්, පොදු සමෘද්ධිය සඳහා පෙළඹවීමක් ඇති කිරීමට චීනය කටයුතු කරන බව ද එහිදී සඳහන් වුණා.
දිනූෂි ධීරසිංහ
