අන්තර්ජාල මූල්‍ය වංචාවක් සම්බන්ධයෙන් ඊයේ (නොවැම්බර් 08) පස්වරුවේ හැව්ලොක් සිටි සංකීර්ණයේදී අත් අඩංගුවට ගත් ශ්‍රී ලාංකිකයින් 58 දෙනා අතරින් ඔවුන්ගේ අධ්‍යක්ෂවරුන් ලෙස කටයුතු කළ දෙදෙනෙකු රක්ෂිත බන්ධනාගාරගත කිරීමට කොළඹ මහේස්ත්‍රාත් අධිකරණය අද (09) නියම කර තිබේ.
සෙසු 56 දෙනා ඇප මත මුදා හැරීමටයි හර්ෂණ කැකුලාවල මහේස්ත්‍රාත්වරයා නියම කර ඇත්තේ.
මෙම සිද්ධිය සම්බන්ධයෙන් අදහස් දක්වමින් පොලිස් මාධ්‍ය ප්‍රකාශක නිහාල් තල්දූව මහතා ප්‍රකාශ කර තිබුණේ ශ්‍රී ලංකාවේ පිහිටි විදේශීය තානාපති කාර්යාලයකින් ලැබුණු පැමිණිල්ලක් අනුව මෙම වැටලීම සිදුකළ බව ය. කොරියාවේ සිටින කොරියානු ජාතිකයකුගෙන් රුපියල් කෝටි 30කට ආසන්න මුදලක් වංචා කර ඇති බවට පැමිණිල්ලක් ලැබුණු බව පැවසූ ඒ මහතා මෙම ස්ථානය අන්තර්ජාලය ඔස්සේ මුදල් කොල්ලකන කඳවුරක් වශයෙන් පවත්වාගෙන ගොස් ඇතැයි අනාවරණය වූ බවත් මාසිකව රුපියල් ලක්ෂ 90 කට වැඩි මුදලක් කුලිය වශයෙන් ගෙවමින් මෙම ස්ථානය පවත්වාගෙන ගොස් ඇති බවත් සඳහන් කළේය.
