කොළඹ LNW:අල්ලස් හෝ දුෂණ චෝදනා විමර්ශන කොමිෂන් සභාව විසින් පසුගිය කාලයේදී ඉල්ලා අස්කරගත් නඩු තුනක් නැවත පැවරීමට තීරණය කර ඇති බව එහි අධ්‍යක්ෂ ජනරාල් මහාධිකරණ විනිසුරු රංග ශ්‍රීනාත් අබේවික්‍රම දිසානායක මහතා පවසයි.
එම නඩු මොනවාද යන්න පිළිබඳ තොරතුරු දැනට අනාවරණය කළ නොහැකි අතර ඒවා නැවත නොපවරවා සිටීමට දක්වා තිබුණු හේතු සම්බන්ධයෙන් වත්මන් කොමිසමට සෑහීමට පත්වීමට නොහැකි නිසා එම නඩු පැවරීමට තීරණය කර ඇත.
අල්ලස් හෝ දුෂණ චෝදනා විමර්ශන කොමිසම විසින් පසුගිය 2019 සිට මේ දක්වා නඩු 102ක් ඉල්ලා අස්කර ගෙන තිබෙන අතර වැඩිම නඩු ප්‍රමාණයක් ඉවත්කරගෙන ඇත්තේ 2021 සහ 2022 වසර තුළදීය.
ඒ අනුව 2021 වසරේ ඉවත් අකර ගෙන තිබෙන නඩු ප්‍රමාණය 44කි. 2022 දී නඩු 49ක් ඉවත් කර ගෙන ඇත.
ඒ අතරින් නඩු 34ක් නැවත නොපවරවා සිටීමට පසුගිය සමයේ හේතු දක්වා නොතිබුණ නමුත් මේ වන විට නිශ්චිතව එම හේතු දක්වා ඇති බවද අධ්‍යක්ෂ ජනරාල්වරයා සඳහන් කරයි.
ආශිකා බ්‍රාහ්මණ
