ඇමෙරිකානු තානාපතිනී ජුලී චන්ග් මැතිනිය ඉකුත් අප්‍රේල් මස හතර වැනිදා ශ්‍රී ලංකාවේ උසස් අධ්‍යාපනයේ හැරවුම් ලක්ෂයක් සනිටුහන්කළ NSBM හරිත සරසවියට පැමිණියා ය. ඈ පැමිණියේ NSBM හරිත සරසවියටත් ජාත්‍යන්තර මට්ටමේ උසස් අධ්‍යාපනයක් ලැබීමට නොනිත් ආශාවෙන් පෙළෙන ශ්‍රී ලාංකික දරු දැරියන්ටත් සුබාරංචියක් රැගෙන ය. ඇය හරිත සරසවියට ආවේ ඇමරිකා එක්සත් ජනපදයේ ඉහළම පිළිගැනීමක් තිබෙන ඇමරිකානු විශ්වවිද්‍යාලය සමඟ සහයෝගීතා ගිවිසුමකට අත්සන් තබන ගෞරවනීය අවස්ථාවට සහභාගී වීමට ය. ඒ නිසා ඇය හරිත සරසවියට පැමිණි ගමන ජාත්‍යන්තර මට්ටමේ පිළිගත් විශ්වවිද්‍යාලයක ඉගෙනුම ලැබීමට නොනිත් ආශාවෙන් පෙළෙන ශ්‍රී ලාංකික දරුදැරියන්ට ගෙනා සුබ ආරංචියකි. ඒ සඳහා විශ්වවිද්‍යාල දෙක අතරත්, රටවල් දෙක අතරත් අවබෝධය ඇතිකොට මඟ පෙන්වා දී තිබුණේ වර්තමානයේ ඇමරිකා එක්සත් ජනපදයේ තානාපති ගරු මහින්ද සමරසිංහ මැතිතුමාත්, එතුමාගේ මෙහෙයවීමෙන් එරට ශ්‍රී ලංකා තානාපති කාර්යාලයත් විසිනි.
හරිත සරසවිය සමඟ සහයෝගීතා ගිවිසුමකට එළඹුන ඇමරිකානු සරසවිය 1893 දී පිහිටුවනු ලැබූ දැනට වසර එකසිය තිස් දෙකක් පැරණි ෙඑතිහාසික වටිනාකම් රැසක් රැගත් වොෂිංටන් නගරයේ තිබෙන විශ්වවිද්‍යාලයකි. එය සියවසකට අධික කාලයක් ඇමරිකාවේත් ලෝකය පුරාමත් දේශපාලන නීති, ජනමාධ්‍ය සංස්කෘතික සේම ආර්ථික ක්ෂේත්‍රයේ මැදිහත්වීම් කරනු ලැබූ කීර්තිමත් විශිෂ්ටයන් බිහිකළ විශ්වවිද්‍යාලයකි. වසර සියයක් ඉක්මවා විශ්වවිද්‍යාලයක් පවත්වාගෙන යනවිට අත්පත් කර ගන්නා ගුණාත්මක හා හරයාත්මක බරසාර වටිනාකම් ලොව කවර විශ්වවිද්‍යාලයකට වුව අත්පත් කර ගැනීම දුර්ලභ කාරණයකි.
ඇමරිකානු විශ්වවිද්‍යාලය මේ සහයෝගීතා ගිවිසුම අත්සන් කළේ ලංකාවේ උසස් අධ්‍යාපනයේ හැරවුම් ලක්ෂයක් සනිටුහන්කළ විශ්වවිද්‍යාලය සමඟ ය. ඒ නිසා ලොව පිළිගත් නූතන අධ්‍යාපන ක්‍රමවේදයන් ඉතාමත් ඉහළින් ක්‍රියාත්මක කරන ලංකාවේ උසස් අධ්‍යාපන ක්ෂේත්‍රයේ නූතන ඵලදායී මොඩලය වූ හරිත විශ්වවිද්‍යාලය ඇමෙරිකා එක්සත් ජනපදයේ වොෂිංටනයේ ෙඑතිහාසික විශ්වවිද්‍යාලයක් සමඟ අත්වැල් බැඳගැනීම කාලෝචිත ය.
මෙම සහයෝගීතාව හරහා NSBM හරිත සරසවියේ සිසුන්ට ව්‍යාපාර පරිපාලනය පිළිබඳ උපාධියේ මුල් වසර දෙක ශ්‍රී ලංකාවේ දී සහ අවසන් වසර දෙක ඇමරිකාවේ වොෂිංටනයේ ඇමරිකානු විශ්වවිද්‍යාලයේ දී හැදෑරීමෙන් ඇමෙරිකානු විශ්වවිද්‍යාලයේ උපාධිධාරීන් බවට පත්වීමට හැකි වේ. එසේම එය මෙරට දරුවන්ට ලොව පිළිගත් ජාත්‍යන්තර උපාධියක් සාපේක්ෂව ඉතා අඩු පිරිවැයකින් ලබා ගැනීමට පහසු මාර්ගයක් විවරකර දීමකි.
එපමණක් නොවේ, එය NSBM හරිත සරසවියේ උපකුලපති මහාචාර්ය E.A. වීරසිංහ මහතා උසස් අධ්‍යාපනය පිළිබඳව දරන සාර දර්ශනය ක්‍රියාවට නඟන NSBM හි ගෝලීය ව්‍යාප්ති ප්‍රයන්තයන්හි ඉදිරි ගමනකි. එය ඉදිරි දැක්මක් සහිතව යන නොනවතින ගමනේ සන්ධිස්ථානයකි. සහයෝගීතා ගිවිසුම අත්සන්කළ තානාපතිනිය තම කෙටි දෙසුම මෙම වදන්වලින් සැරසුවාය.
“මේ හරිත සරසවියට පැමිණ එය ගවේෂණය කරනකොට එය ඉතාම සුන්දර විශ්වවිද්‍යාලයක් බව දැණුනා. හරිත සරසවිය උසස් අධ්‍යාපනයේ සහ නවෝත්පාදනයේ කෙන්ද්‍රස්ථානයන් හැටියට දශකයකට ආසන්න කාලයක් ශ්‍රී ලාංකික සිසුන් පෝෂණය කරලා තිබෙනවා.”
හරිත සරසවියේ සුන්දරත්වය පිළිබඳ ඉතාම සතුටටත්, පුදුමයටත් පත්වුණ ඇමෙරිකානු තානාපතිනිය මේ විශ්වවිද්‍යාල අතර අත්සන්කළ ගිවිසුම නිසා ලාංකික සිසුන්ට ජාත්‍යන්තර ලැබෙන වටිනාකම ගැන ද විස්තර කළේ ඉතා සතුටිනි.
මෙම ගිවිසුමට අත්සන් කරනු ලැබුවේ NSBM හරිත සරසවිය පාර්ශවයෙන් විශ්වවිද්‍යාලයේ උපකුලපති E.A. වීරසිංහ මහතා වෙනුවෙන් ව්‍යාපාර පීඨයේ පීඨාධිපති සහ වැඩබලන කුලපතිනි තිලිණි ද සිල්වා මහත්මිය සහ ඇමරිකානු විශ්වවිද්‍යාලයේ ජාත්‍යන්තර හවුල්කාරීත්ව සහ උපායමාර්ගික මුල පිරීම් අධ්‍යක්ෂ ටෂීනා ගිරෝඩ් මහත්මිය ය.
ඇමෙරිකානු තානාපතිනි ජුලී චැන්ග් මහත්මිය මෙම ෙඑතිහාසික සහයෝගීතාව සිහිපත් කිරීමට හරිත සරසවි බිමේ ජාතික වෘක්ෂය වූ නා පැළයක් රෝපණය කළාය. නා පැළය අනාගතයේ විසල් වෘක්ෂයක් බවට පත්ව හරිත සරසවියේ හරිත වර්ණයට එක්වෙමින් මේ සහයෝගීතාව ගැන විශ්වයට කියාපානු ඇත.
