මාසයක් තිස්සේ අවිහිංසාවාදී අරගලයක නිරත වූ පුද්ගලයන්ට එල්ල වූ නින්දිත ප්‍රහාරය ඉතා දැඩිව හෙළා දකින බව ඕමල්පේ සෝභිත හිමි පවසනවා. මහින්ද රාජපක්ෂ වැනි රටම පිළිගත් නායකයෙකුගෙන් මෙවැනි නින්දික ක්‍රියාවක් කිසිසේත්ම බලාපොරොත්තු නොවූ බවයි සෝභිත හිමි පවසන්නේ.
ඊයේ දිනයේදී අනුරාධපුර අටමස්ථාන වන්දනා කර කොළඹ පැමිණි මහින්ද රාජපක්ෂ මහතා අද දිනයේදී මෙවැනි ක්‍රියාවක නිරත වනු ඇතැයි කිසිසේත් බලාපොරොත්තු නොවූ බවයි, ආගමික නායකයන්ගේ මූලිකත්වයෙන් අද පස්වරුවේ කොළඹ පැවති මාධ්‍ය හමුවට සහභාගිවෙමින් සෝභිත හිමි සඳහන් කළේ.
අතීතයේදී හිට්ලර්, පොල්පොට් වැනි නායකයන් සිදුකළ මිනිස් සංහාර සහ අද සිදු වූ ප්‍රහාරය එකිනෙක සමාන බව පෙන්වා දෙන සෝභිත හිමි පවසන්නේ පොල්පොට්, හිට්ලර් වැනි නායකයන්ගේ ලැයිස්තුවට මහින්ද රාජපක්ෂ මහතාගේ නම අද එක් වූ බවයි.
මෙම ප්‍රහාරයේ වගකීමෙන් මහින්ද රාජපක්ෂ මහතාට පමණක් නොව ජනාධිපති ගෝඨාභය රාජපක්ෂ මහතාටද නිදහස් විය නොහැකි බවත්, සියලු රාජපක්ෂවරුන් මෙම ප්‍රහාරයේ වගකීම බාරගත යුතු බවත් සෝභිත හිමි අවධාරණය කරනවා.
UN
