රෂිකා හෙන්නායක ජුනි 06, කොළඹ LNW :
ප්‍රබල මත්ද්‍රව්‍ය ජාවාරම්කරුවකු වන මේ වනවිට විදේශ ගතව සිටින, කෙහෙල් බද්දර පද්මේ යන අයට විදේශ ගමන් බලපත්‍ර දෙකක් සකස් කිරීමේ සිද්ධිය සම්බන්ධයෙන් සැකපිට රක්ෂිත බන්ධනාගාර ගත කර සිටි ආගමන හා විගමන දෙපාර්තමේන්තුවේ සහකාර පාලක ඇතුළු සැකකරුවන් තුන්දෙනා ඇප මත මුදා හරින ලෙස කොළඹ මහේස්ත්‍රාත් අධිකරණය විසින් නියම කර ඇති බව වාර්තා වේ.
ඒ අනුව සැකකරුවන් රුපියල් මිලියනය බැගින් වූ ශරීර ඇප දෙකක් මත මුදා හැරීමට කොළඹ ප්‍රධාන මහේස්ත්‍රාත් තනූජා ලක්මාලී මහත්මිය නියම කර ඇත.
සැකකරුවන්ගේ විදේශ ගමන් තහනම් කළ අධිකරණය ඔවුන්ගේ විදේශ ගමන් බලපත්‍ර අධිකරණයට භාරදිය යුතු බවටත් නියෝගයක් නිකුත් කරනු ලැබු අතර ඉන් අනතුරුව නඩුව නොවැම්බර් මස 13 වන දා යළි කැඳවීමටද නියම කෙරුණ බව පැවසේ.
තවද, ඇප ලබා ගැනීමෙන් අනතුරුව අනෙකුත් සැකකරුවන් දෙදෙනා මේ මස 13 වනදා අපරාධ පරීක්ෂණ දෙපාර්තමේන්තුවට ගොස් ප්‍රකාශයක් ලබාදිය යුතු බවටත් නියෝගයක් නිකුත් කර තිබෙන බව වාර්තා වේ.
