නිශ්මං රණසිංහ ජූලි 16, කොළඹ LNW:
ශ්‍රී ලංකාව සහ බංගලාදේශය අතර පැවත්වෙන විස්සයි විස්ස තරගාවලියේ තෙවැනි තරගය අද කොළඹ ආර් ප්‍රේමදාස ක්‍රීඩාංගණයේදී පැවත්වෙනවා.එම තරගය සම්බන්ධයෙන් ඊයේ (ජූලි 15) වන දා පැවති මාධ්‍ය සාකච්ඡාවට එක්වෙමින් ශ්‍රී ලංකා කණ්ඩායමේ ප්‍රධාන පුහුණුකරු සනත් ජයසූරිය ප්‍රකාශ කළ කරුණුවලට අනුව අද තරගයේදී දිනේෂ් චන්දිමාල් සහ කමිඳු මෙණ්ඩිස් දෙදෙනාම අද තරගයේදී ක්‍රීඩා කරනු ඇතැයි සිතිය හැකියි.
විශේෂයෙන්ම අවිශ්ක ප්‍රනාන්දු යොදා ගැනීම සම්බන්ධයෙන් කළ කරුණු දැක්වීම්වලට පිළිතුරු දෙමින් සනත් ප්‍රකාශ කළේ ඔහු සමඟ නිරන්තර සාකච්ඡාවක පසුවන බවත්,ඔහුට උපකාර කළ යුතුව ඇත්තේ තරගයට සුදුසු පරිදි මානසිකත්වය සකසා ගැනීම වෙනුවෙන් බවත් ය.
අද තරගයේදී ඉකුත් තරග දෙකේදීම පන්දු නොයවන ලද චරිත් අසලංක ද යොදා ගැනීමට හැකි බවත්,කමිඳුගේ පැමිණීමක් සිඳු වුවහොත් ඔහු ද පන්දු යැවීමට හැකි අයෙකු බවත් සනත් පෙන්වා දුන්නා.එසේම දිනේෂ් චන්දිමාල් දීර්ඝ කාලයකින් ජාත්‍යන්තර විස්සයි විස්ස තරගයකට ක්‍රීඩා කර නොමැති බව මාධ්‍යය පෙන්වා දුන්නත් සනත් පැවසුවේ ඔහු ඕනෑම අවස්ථාවක කණ්ඩායම විසින් පවරනු ලබන වගකීමට සාධාරණය ඉටු කරන්න සූදානමින් සිටින ක්‍රීඩකයෙකු බවයි.ඒ අනුව අද කණ්ඩායම ඔහුට පවරන අංක 1,2,3 හෝ 4 ස්ථානයක දී ඔහුට ක්‍රීඩා කරන්නට විශාල ඉඩක් ඇති බව ද සනත් පවසා සිටියා.
