සටහන: සශිකලා මධුෂාණි
අගෝස්තු 17: ලෝකය(අවුට්බවුන්ඩ් ටුඩේ): උතුරු පකිස්ථානය පුරා ඇති වූ හදිසි ගංවතුර තත්ත්වය හේතුවෙන් පසුගිය පැය 48 තුළ අවම වශයෙන් පුද්ගලයින් 321 දෙනෙකු මිය ගොස් ඇති බව එරට ආපදා අධිකාරිය තහවුරු කර ඇත.
මෙම මරණ වලින් 307ක් කඳුකර කයිබර් පක්තුන්ක්වා පළාතේ වාර්තා වී ඇති අතර පකිස්ථාන පරිපාලනය යටතේ පවතින කාශ්මීරය, උතුරු ගිල්ගිට්-බෝල්ටිස්තාන් කලාපයේ තවත් මරණ වාර්තා වී ඇත.
රජය විසින් කඳුකර දිස්ත්‍රික්ක වන බුනර්, බජාවුර්, ස්වාට්, ෂැන්ග්ලා, මන්සෙහ්රා සහ බට්ටග්‍රෑම් ආපදා ප්‍රදේශ ලෙස ප්‍රකාශයට පත් කර ඇති අතර ආපදාවට ලක්ව ඇති දිස්ත්‍රික්ක නවයක සහන මෙහෙයුම් සිදු කිරීමට ගලවා ගැනීමේ සේවකයින් 2,000 ක් පමණ යොදවා ඇති අතර අධික වර්ෂාපතනය හේතුවෙන් ප්‍රදේශ කිහිපයක නායයෑම් සහ මාර්ග ජලයෙන් යටවීම හේතුවෙන් ගලවා ගැනීමේ මෙහෙයුම් අසීරු කර ඇත.
ඉදිරි පැය කිහිපය තුළ පකිස්ථානයේ වයඹ දෙසින් තද වැසි ඇති විය හැකි බවට කාලගුණ විද්‍යා දෙපාර්තමේන්තුව අනතුරු අඟවා ඇති අතර ජනතාවගෙන් පූර්වාරක්ෂාකාරී පියවර ගන්නා ලෙස ඉල්ලා ඇත.
