සටහන – රුවන් නෙළුගොල්ල
මත්ද්‍රව්‍ය ජාවාරම් සහ සංවිධානාත්මක අපරාධවලට දකුණේ දේශපාලනඥයින් සම්බන්ධ බවට මේ වනවිට තොරතුරු අනාවරණය වී ඇති බව මහජන ආරක්ෂක අමාත්‍ය ආනන්ද විජේපාල මහතා පවසයි.
“වත්මන් රජය බලයට පැමිණීමෙන් පසුව මේ පාතාල ක්‍රියාකාරකම් සහ මත්ද්‍රව්‍ය ජාවාරම් මර්දනය කිරීම සඳහා ක්‍රියාමාර්ග රාශියක් අරන් තියෙනවා. මේ වෙනකොට සාර්ථක ප්‍රතිඵල ලබාගනිමින් තියෙනවා. මේ පාතාල ක්‍රියාකාරමක් සහ මත්ද්‍රව්‍ය ජාවාරම් අතර සෘජු සම්බන්ධයක් තියෙනවා. ඒ වගේම මේකට දේශපාලන ආශිර්වාදය සහ දේශපාලන සබඳතා පවතින බව කවුරුත් දන්නා කාරණයක්. නමුත් අපි බලයට පත්වුණාට පස්සේ ඒ දේශපාලන සංස්කෘතිය අවසන් කරලා තියෙනවා.
අපි රටේ ජනතාවට විශේෂයෙන් කාරණයක් කියන්න ඕනේ. විශේෂයෙන් මත්ද්‍රව්‍ය සහ සංවිධානාත්මක අපරාධ සම්බන්ධයෙන් දේශපාලන සබඳතා තිබෙන බවට මේ වනවිට යම් යම් තොරතුරු අනාවරණය වී තිබෙනවා. විශේෂයෙන් දකුණේ දේශපාලනඥයින් මෙයට සම්බන්ධ බවට. විශේෂයෙන් මහජනතාව මේ වනවිට තොරතුරු ලබාදෙමින් තිබෙනවා. පොලීසිය සක්‍රීයව රාජකාරිය ඉටුකරමින් ඉන්නවා. බුද්ධි අංශ තොරතුරු විශාල ප්‍රමාණයක් ලැබෙමින් තිබෙනවා. මහජනතාවට අයාචනා කරනවා ඔබ දන්නා තොරතුරු පොලීසියට ලබාදෙන්න. ඒ තොරතුරු සහ පුද්ගලයාගේ ආරක්ෂාව සුරක්ෂිත කරනවා”
මහජන ආරක්ෂක අමාත්‍ය ආනන්ද විජේපාල මහතා මේ බව පැවසුවේ ඊයේ (22) සිදුකළ විශාල මත්ද්‍රව්‍ය වැටළීම් පිළිබඳ දැනුවත් කිරීම සඳහා පැවැත්වූ මාධ්‍ය හමුවක් අමතමිනි.
