නේෂන්ස් ට්‍රස්ට් බැංකුව (NTB) විසින් HSBC ශ්‍රී ලංකාවේ සිල්ලර බැංකු මෙහෙයුම් රුපියල් බිලියන 18 කට අත්පත් කර ගැනීම සඳහා ගිවිසුමකට අත්සන් කරන බව නිවේදනය කර තිබේ.
නේෂන්ස් ට්‍රස්ට් බැංකුව විසින් මෙම අනාවරණය සිදුකර ඇත්තේ කොළඹ කොටස් වෙළෙඳපොළ වෙත දැනුම් දීමක් කරමිනි.
පෙරේදා (23) දිනයේ දී නේෂන්ස් ට්‍රස්ට් බැංකු අධ්‍යක්ෂ මණ්ඩලය මේ සඳහා අනුමැතිය ලබා දී ඇති අතර ඊට අදාළ ගිවිසුම සඳහා ඊයේ (24) දිනයේ දී එළඹ ඇත.
මෙම ගිවිසුම 2026 පළමු භාගයේ දී අවසන් කිරීමට නියමිත බව නේෂන්ස් ට්‍රස්ට් බැංකුව වැඩිදුරටත් සඳහන් කරයි.
මෙම ව්‍යාපාර අත්පත් කර ගැනීමට අනුව HSBC ශ්‍රී ලංකාහි ප්‍රමුඛ ගනුදෙනුකරුවන්ගේ බැංකු කටයුතු, ක්‍රෙඩිට් කාඩ්, ගනුදෙනුකරුවන් 200,000කට ආසන්න පිරිසකගේ පුද්ගලික ණය සහ ගිණුම් ඊට අයත් වනු ඇත.
