ජාතික ජන බලවේගයේ පාර්ලිමේන්තු මන්ත්‍රීනී ලක්මාලි හේමචන්ද්‍ර මෙනවිය පසුගියදා තිඹිරිගස්යාය ප්‍රාදේශීය සම්බන්ධීකරණ රැස්වීමේදී සිදුකළ ප්‍රකාශයකින් අධිකරණයට අපහාසයක් සිදුකර ඇති බවට පැමිණිල්ලක් නව ජනතා පෙරමුණේ නියෝජිතයින් පිරිසක් විසින් ඊයේ (21) අධිකරණ සේවා කොමිසමට ඉදිරිපත් කරන ලදී.
මෙම පැමිණිල්ල ඉදිරිපත් කරන ලද්දේ නව ජනතා පෙරමුණේ සීතාවක ප්‍රාදේශීය සභා මන්ත්‍රී නාලක බණ්ඩාර මහතා ඇතුළු පිරිසක් විසිනි.
පැමිණිල්ල ගොනු කිරීමෙන් අනතුරුව මාධ්‍ය වෙත අදහස් දැක්වූ ඒ මහතා,
“අපිට මතකයි ආගමන විගමන පාලක හර්ෂ ඉලුක්පිටිය මහතා අධිකරණ නියෝගයක් ක්‍රියාත්මක නොකිරීම සම්බන්ධයෙන් නීතිය ක්‍රියාත්මක වුණා. ඒ වගේම මතකයි එස්. බී. දිසානායක අමාත්‍යවරයාට නීතිය ක්‍රියාත්මක වුණා. ඒ නිසා මේ සිද්ධිය සම්බන්ධයෙන් අපි අද අධිකරණ සේවා කොමිසමේ ලේකම්තුමාට ලිපියක් යොමුකළා මේ සම්බන්ධයෙන් අවශ්‍ය කටයුතු කරලා, අධිකරණයට අපහාසයක් වෙලා තියෙනවා නම් නීතිමය කටයුතු කරන්න කියලා”
ලක්මාලි හේමචන්ද්‍ර මෙනවිය වහාම අත් අඩංගුවට ගතයුතු බවත් ඇයගේ නීතීඥභාවය අහෝසි කළයුතු බවත් ඔහු වැඩිදුරටත් සඳහන් කළේය.
මේ අතර මෙම සිද්ධිය සම්බන්ධයෙන් ලක්මාලි හේමචන්ද්‍ර මන්ත්‍රීවරියට එරෙහිව එක්සත් ජාතික පක්ෂයේ නියෝජිතයින් පිරිසක් ඊයේ දිනයේදී අපරාධ පරීක්ෂණ දෙපාර්තමේන්තුවට ද පැමිණිල්ලක් ගොනුකර තිබිණි.
සබැඳි පුවත් –
