සටහන: සශිකලා මධුෂාණි
නොවැම්බර් 17: ලෝකය(අවුට්බවුන්ඩ් ටුඩේ) : බංග්ලාදේශයේ හිටපු අගමැතිනිය වන ෂෙයික් හසීනාහට අද(17)දිනයේදී විශේෂ විනිශ්චය සභාවක් විසින් මරණ දඬුවම ලබා දිය හැකි බව ෂෙයික් හසීනාගේ පුත්‍රයා වන සජීබ් වාසෙඩ් එක්සත් ජනපද අගනුවර වන වොෂින්ටන් සිට ප්‍රකාශ කර තිබේ.
2024 වසරේදී රජයට එරෙහිව විදී බසින ලද විරෝධතාකරුවන්ට මාරාන්තික මර්දනයක් ක්‍රියාත්මක කිරීම හේතුවෙන් මනුෂ්‍යත්වයට එරෙහි අපරාධ සම්බන්ධයෙන් ඩකාහි අධිකරණය අද(17) හසීනාට එරෙහිව රුපවාහිනිය හරහා තීන්දුවක් ලබා දීමට පෙර මෙම අදහස් ඇයගේ පුත්‍රයා විසින් ජාත්‍යන්තර මාධ්‍ය වෙත ප්‍රකාශ කර ඇත.
78 හැවිරිදි හසීනා, 2024 අගෝස්තු මාසයේදී බංග්ලාදේශයෙන් පලා ගිය දා සිට නවදිල්ලියේ පිටුවහල්ව ජීවත්වන අතර එක්සත් ජාතීන්ගේ වාර්තාවකට අනුව, එම වසරේ පැවති පෙළපාලි අතරතුර පුද්ගලයින් 1,400 ක් පමණ මිය ගිය අතර, ඉන් වැඩි දෙනෙක් ආරක්ෂක හමුදා ජීව උණ්ඩවලින් වෙඩි තබා ඝාතනය කරන ලදී. මාරාන්තික මර්දනය සම්බන්ධයෙන් හිටපු නායිකාව බංග්ලාදේශයේ ජාත්‍යන්තර අපරාධ විනිශ්චය සභාවේදී නඩු විභාගයකට මුහුණ දෙමින් සිටින අතර ඇය වැරදි ප්‍රතික්ෂේප කරන අතර ක්‍රියාදාමය දේශපාලනික වශයෙන් අභිප්‍රේරණය කර ඇති බව පවසයි.
මේ වන විට එළඹෙන මැතිවරණයට මුහුණ දිය නොහැකි වන පරිදි හසිනාගේ පක්ෂය වන අවාමි ලීගය පක්ෂය මේ වන විට තහනම් කර ඇති අතර නොබෙල් ත්‍යාගලාභී මුහම්මද් යූනුස්ගේ නායකත්වයෙන් යුත් අන්තර්කාලීන රජය, මැයි මාසයේදී පක්ෂයේ ලියාපදිංචිය අත්හිටුවා, ජාතික ආරක්ෂක තර්ජන සහ ජ්‍යෙෂ්ඨ නායකයින් සම්බන්ධයෙන් යුද අපරාධ විමර්ශන උපුටා දක්වමින් එහි දේශපාලන ක්‍රියාකාරකම් තහනම් කර ඇත.
බංග්ලාදේශයේ ප්‍රචන්ඩ ක්‍රියා මේ වන විට වර්ධනය වෙමින් පවතින බව වාර්තා වන අතර නොවැම්බර් 12 වන දින පමණක් වාර්තා වූ පිපිරීම් 32 කින් පසුව, ඉරිදා(16) නගරය පුරා බොරතෙල් බෝම්බ පුපුරා ගොස් ඇත. බස් රථ විශාල ප්‍රමාණයක් ගිනි තබා ඇති අතර, කඩාකප්පල්කාරී ක්‍රියාවන් සම්බන්ධයෙන් බලධාරීන් අවාමි ලීග් ක්‍රියාකාරීන් අත්අඩංගුවට ගෙන තිබේ.
