ගුවන් හමුදාපති එයාර් මාර්ෂල් සුදර්ශන පතිරණ මහතාට අයත් නිවසක ජනාධිපති ගෝඨාභය රාජපක්ෂ මහතා රැඳී සිටින බවට පැතිර යන පුවත් සම්පූර්ණයෙන් අසත්‍ය බව ගුවන් හමුදාව පවසනවා. එම පුවත්වල කිසිදු සත්‍යතාවයක් නොමැති බවයි ගුවන් හමුදාව නිවේදනයක් නිකුත් කරමින් කියා සිටින්නේ.
ශ්‍රී ලංකා පොලීසිය දේශපාලනීකරණයෙන් මුදා ගැනීමේ ජාත්‍යන්තර සංවිධානය නමැති සංවිධානයේ සභාපති, විශ්‍රාමික පොලිස් නිළධාරී අජිත් ධර්මපාල මහතා සිය ෆේස්බුක් ගිණුම හරහා වීඩියෝවක් නිකුත් කරමින් ගෝඨාභය රාජපක්ෂ මහතා රැඳී සිටින ස්ථානය පිළිබඳව අනාවරණය කර තිබිණි.
ගුවන් හමුදාවේ සහ ගුවන් හමුදාපතිවරයාගේ කීර්තිනාමයට හානි කිරීමේ අරමුණින් හා ගුවන් හමුදාව කෙරෙහි මහජනතාව තුළ වෛරය හා ක්‍රෝධය පැතිරවීමේ අරමුණින් මෙවැනි අසත්‍ය පුවත් සමාජගත කරන බවට ගුවන් හමුදාව චෝදනා කරනවා.
ගුවන් හමුදාව ජනතාවගෙන් ඉල්ලා සිටින්නේ මෙවැනි පුවත්වලට රැවටීමෙන් වැළකී සාමකාමීව කටයුතු කරන ලෙසයි.
UN
