රෂිකා හෙන්නායක දෙසැම්බර් 01, කොළඹ LNW :
ශ්රී ලංකා ගුවන් හමුදාවෙන් ඉල්ලීමක් කර තිබේ. ඒ, සහන මෙහෙයුම්වල නිරත වන ප්රදේශවල ඩ්රෝන යානා ක්රියාත්මක කිරීමෙන් වළකින ලෙසයි.
මානුෂීය ආධාර සහ ආපදා සහන මෙහෙයුම් අතරතුර ඩ්රෝන මෙහෙයුම් ක්රියාත්මක කිරීම නිසා ශ්රී ලංකා ගුවන් හමුදාව මඟින් කරනු ලබන ගුවන් මෙහෙයුම් සඳහා අවදානම් තත්ත්වයක් ඇති කර තිබෙන බවත්, ගුවන් අවකාශයේ අනවසර ඩ්රෝන යානා පැවතීම ගුවන් ගමන් මාර්ගවලට සහ මුදාගැනීමේ සහ සහන මෙහෙයුම්වලට බාධා කළ හැකි අතර ගුවන් යානා අනතුරු සිදුවීමට ඉඩ ඇති බව ද ගුවන් හමුදාව පෙන්වා දෙයි.
ගුවන් හමුදාව නිකුත් කළ නිවේදනයේ වැඩිදුරටත් දැක්වෙන්නේ, එවැනි සිදුවීම් යානයේ සිටින ගුවන් කාර්ය මණ්ඩල සාමාජිකයින්ගේ ජීවිත, ගුවන් යානා සහ භූමියේ සිටින පුද්ගලයින්ට බරපතළ තර්ජනයක් එල්ල කරන බවයි. මේ වන විට ගුවන් හමුදාව විසින් ක්රියාත්මක කරන මානුෂීය ආධාර සහ ආපදා සහන මෙහෙයුම්වල ආරක්ෂාව සහ කාර්යක්ෂමතාව සහතික කිරීම සඳහා, ශ්රී ලංකා ගුවන් හමුදාව මහජනතාවගෙන් මෙම ඉල්ලීම සිදුකරයි.
තවද සියලුම ඩ්රෝන යානා ක්රියාත්මක කිරීමට පෙර එම යානා ගුවන්ගත කිරීමේ සහ ගොඩබෑමේ වේලාවන් පිළිබඳව පහත අංක අමතා ශ්රී ලංකා ගුවන් හමුදාවට දැනුම් දෙන ලෙස මහජනතාවගෙන් ඉල්ලා සිටී.
සාමාන්ය දුරකථන: 0112343970 / 0112343971
ක්ෂණික දුරකථන: 115
