ඊයේ (22) අළුයම ජනාධිපති කාර්යාලය අසල සිදුවූ සිදුවීම් සම්බන්ධයෙන් පොලිසියේ පාර්ශ්වයෙන් කරුණු පැහැදිලි කිරීමක් අද (23) දිනයේදී පොලිස් මාධ්‍ය ප්‍රකාශක නිහාල් තල්දූව මහතා සිදුකළේය.
ඒ, විශේෂ මාධ්‍ය හමුවක් පවත්වමිනි.
ආණ්ඩුක්‍රම ව්‍යවස්ථාවෙන් ජනතාවට ලබාදී ඇති අයිතිවාසිකම් භුක්ති විඳීම, සාමකාමීව රැස්වීම, සාමකාමීව විරෝධතා දැක්වීම යනාදියට ජනතාවට ඇති අයිතිය පිළිගන්නා නමුත් නීතිය හෑල්ලුවට ලක්කිරීමට කිසිවෙකුට ඉඩ තැබිය නොහැකි බවත් ඒ මහතා සඳහන් කළේය.
ගෝල්ෆේස් අරගල භූමිය වෙත රාජකාරි කටයුතු සඳහා ගිය පොලිස් නිලධාරීන්ට අරගලකරුවන් බාධා කළ ආකාරය දැක්වෙන වීඩියෝ දර්ශන කිහිපයක් ද පොලිස් මාධ්‍ය ප්‍රකාශකවරයා මාධ්‍ය වෙත නිකුත් කළේය.
එසේම ජනාධිපති කාර්යාලය යනු මහජනතාව වෙනුවෙන් තීන්දු තීරණ ගන්නා ප්‍රධානතම කාර්යාල පද්ධතිය වන බැවින් නව විධායක ජනාධිපතිවරයකු පත්වූ පසුව එම කාර්යයන් සිදුකරගෙන යාමට අදාළ කාර්යාල පද්ධතිය නිදහස් කරදීම පොලිසියට පැවරී ඇති වගකීමක් බවත් ඒ මහතා ප්‍රකාශ කළේය.
RN
