ජෝන් කීල්ස් හෝල්ඩිංග්ස් හි අනුබද්ධිත ආයතනයක් වන ජෝන් කීල්ස් හොටෙල්ස් පීඑල්සී සමාගම විසින් මහනුවර පිහිටි සිනමන් සිටඩෙල් හෝටලයේ සිය පාලන කොටස්, දැඩිගම සමූහ ව්‍යාපාරයේ සත්කාරක සේවා අංශය වන ලැවෙන්ඩිෂ් ලෙෂර් වෙත විකිණීම සඳහා වන බැඳීම් ගිවිසුමකට එළඹ තිබේ.
2026 මාර්තු මස 12 සහ 13 යන දිනවලදී කොළඹ කොටස් වෙළෙඳපොළ වෙත කරන ලද ආයතනික දැනුම්දීමකට අනුව, මෙම ගනුදෙනුවෙහි වටිනාකම රුපියල් බිලියන 2.777 ක් පමණ වන බව නිල වශයෙන් ප්‍රකාශයට පත් කර ඇත.
මෙම ගනුදෙනුව හරහා සිනමන් සිටඩෙල් හි හිමිකාරීත්වය දරන කැන්ඩි වෝක් ඉන් ලිමිටඩ් සමාගමේ නිකුත් කළ කොටස් ප්‍රාග්ධනයෙන් සියයට 98.39 ක ප්‍රතිශතයක් නව ගැනුම්කරුවන් වෙත පවරා දෙනු ලබන අතර, අත්පත් කරගැනීමේ ක්‍රියාවලිය 2026 මාර්තු මස 31 වැනි දින වන විට අවසන් කිරීමට අපේක්ෂා කෙරේ.
කෙසේ වෙතත්, මෙම නව ගිවිසුමට අනුව අවම වශයෙන් ඉදිරි මාස දොළහක කාලය සඳහා අදාළ හෝටලයේ කළමනාකරණ කටයුතු පෙර පරිදිම සිනමන් හොටෙල්ස් ඇන්ස් රිසෝට්ස් සන්නාමය යටතේම පවත්වාගෙන යාමට නියමිත බවත් සඳහන්.
