ආශිකා බ්‍රාහ්මණ
කොළඹ LNW:ඉරාන රාජ්‍ය මාධ්‍ය වාර්තා කරන පරිදි, හෝර්මුස් සමුද්‍ර සන්ධියේ පාලනය නැවත ආරම්භ කරන බව ඉරාන හමුදාව පවසයි.
ඉස්ලාමීය විප්ලවවාදී ආරක්ෂක බලකායට (IRGC) සම්බන්ධ ෆාර්ස් ප්‍රවෘත්ති ඒජන්සිය, ඉරාන ශිෂ්‍ය ප්‍රවෘත්ති ඒජන්සිය සහ රාජ්‍ය විකාශන ආයතනය වන IRIB, IRGC ප්‍රකාශයක් උපුටා දක්වමින් කියා සිටියේ සමුද්‍ර සන්ධිය “පෙර තත්වයට” නැවත පැමිණෙන බවත්, සන්නද්ධ හමුදා එම ප්‍රදේශය පාලනය කරන බවත්ය.
මීට පෙර සමහර නැව් යාත්‍රා මෙම ජල මාර්ගය හරහා ගමන් කරන ආකාරය දුටුවද මෙම තීරණාත්මක නැව් මාර්ගය හරහා කොපමණ සමුද්‍ර ගමනාගමනය සිදු වී ඇත්ද යන්න පැහැදිලි නැති බව BBC ද වාර්තා කර තිබේ.
ඉරාන හමුදාව එක්සත් ජනපදයට “කොල්ලකෑම්” චෝදනා කරන අතර, එහි “ඊනියා අවහිර කිරීම” සමුද්‍ර මංකොල්ලයකට සමාන බව පවසයි. එක්සත් ජනපදය තම වරාය අවහිර කිරීම දිගටම කරගෙන ගියහොත් සමුද්‍ර සන්ධිය වසා දමන බව ඉරානය මීට පෙරද පැවසීය.
ඊයේ දිනයේදී ඉරාන විදේශ අමාත්‍යවරයා පැවසුවේ සටන් විරාමයේ ඉතිරි කාලය සඳහා හෝර්මුස් සමුද්‍ර සන්ධිය වාණිජ නැව් සඳහා “සම්පූර්ණයෙන්ම විවෘත” වනු ඇති බවයි.
ඉන් ටික වෙලාවකට පසු, එක්සත් ජනපද ජනාධිපති ඩොනල්ඩ් ට්‍රම්ප් පැවසුවේ සමුද්‍ර සන්ධිය “සම්පූර්ණයෙන්ම විවෘතව ඇති අතර ව්‍යාපාර සඳහා සූදානම්” බවයි. නමුත් සාම ගිවිසුමකට එළඹෙන තෙක් ඉරාන වරායන් සඳහා එක්සත් ජනපදය අවහිර කිරීම දිගටම පවතිනු ඇති බවද ඔහු පැවසීය.
ඒ අනුව තවදුරටත් වොෂින්ටනය සහ ටෙහෙරානය අට්‍ර්හ මත ගැටුම් පවතින බව පෙනෙන්නට ඇති අතර තත්ත්වය තවමත් ව්‍යාකූල ස්වභාවයක් ගනී.
