ආශිකා බ්රාහ්මණ
LNW කොළඹ: මුදල් අමාත්යාංශයේ විදේශ සම්පත් දෙපාර්තමේන්තුවේ පරිගණක පද්ධතිය හරහා ඇමරිකානු ඩොලර් මිලියන 2.5ක වංචා කිරීමේ සිදුවීම පිළිබඳ මේ වන විට සමාජය තුළ දැඩි කතාබහක් මතුව තිබේ.
එය මුදල් අමාත්යවරයා ලෙස ජනාධිපතිවරයාත් අමාත්යාංශ ලේකම්වරයාත් සිය ධූරයන්ගෙන් ඉල්ලා අස්විය යුතු තැනට විපක්ෂයේ විරෝධය එල්ල වෙමින් පවතියි.
ඒ අනුව මෙම සයිබර් මූල්ය අපරාධය සම්බන්ධයෙන් අද (23) මුදල් අමාත්යාංශයේ ලේකම් ආචාර්ය හර්ෂණ සූරියප්පෙරුම මහතා විසින් විශේෂ මාධ්ය හමුවක් කැඳවමින් කරුණු පැහැදිලි කිරීමක් කරන ලදී.
පසුගිය ජනවාරි මාසයේදී සයිබර් අපරාධකරුවන් මුදල් අමාත්යාංශයේ විදේශ සම්පත් දෙපාර්තමේන්තුවේ පරිගණක පද්ධතිය වෙත ඇතුල් වීමට කර තිබූ උත්සාහය සම්බන්ධයෙන් හදුනා ගැනීමෙන් අනතුරුව සිදුකරන ලද විමර්ශනයෙන් මේ වන විට ප්රස්තුත වී තිබෙන පසුගිය දෙසැම්බර් මාසයේ සිදුව ඇති ඩොලර් මිලියන 2.5ක මූල්ය වංචාව හදුනා ගෙන තිබේ.
කෙසේවෙතත් මෙම සිදුවීම් දැනගත් වහාම ශ්රී ලංකා පරිගණක හදිසි ප්රතිචාර සංසදය සහ ශ්රී ලංකා පොලීසියේ පරිගණක අපරාධ අංශය වෙත අදාළ දැනුවත් කිරීම සිදුකර එම විමර්ශන සඳහා සද්භාවයෙන් කටයුතු කළ බවද අමාත්යාංශ ලේකම්වරයා සඳහන් කළේය.
සයිබර් අපරාධකරුවන් විසින් මුදල් අමාත්යාංශයෙන් අත්පත් කරගෙන ඇති එම ඇමරිකානු ඩොලර් මිලියන 2.5ක මුදලෙන් හැකි ප්රමාණයක් යළි ලබාගැනීමට උත්සහා කරන බවද හර්ෂණ සූරියප්පෙරුම මහතා පැවසීය.
සිදුවීම සම්බන්ධයෙන් මේ වන විට මුදල් අමාත්යාංශයේ නිලධාරීන් කිහිප දෙනෙකුට අදාළව විනය ක්රියාමර්ග ද සිදුවෙමින් පවතියි.
