ආශිකා බ්‍රාහ්මණ
කොළඹ LNW:ග්‍රීක බැදුම්කර මිලදී ගැනීමෙන් ශ්‍රී ලංකා රජයට පාඩු සිදුකිරීමේ චෝදනාව මත හිටපු මහ බැංකු අධිපති අජිත් නිවාඩ් කබ්රාල්ට එරෙහිව පවරා ඇති නඩුව ඇසීමට අධිකරණ බලයක් තිබේද යන්න සම්බන්ධයෙන් නියෝගය ජූලි මස 13 වනදා තෙක් කල් තැබීමට ස්ථීර ත්‍රිපුද්ගල මහාධිකරණය නියෝග කළේය.
අල්ලස් හෝ දූෂණ චෝදනා විමර්ශන කොමිසම මගින් පවරා තිබූ එම නඩුව අද (30) ස්ථීර ත්‍රිපුද්ගල මහාධිකරණය හමුවේ කැදවූ අවස්ථාවේ දී මෙම නියෝගය ලබාදී තිබේ.
2018 වසරේ දී අධිකරණ සංවිධාන සංශෝධිත පනත යටතේ පිහිටවූ ස්ථීර ත්‍රිපුද්ගල මහාධිකරණය හමුවේ මෙම නඩුව විභාගයට ගත නොහැකි බව නීතිමය කරුණු දක්වමින් අජිත් නිවාඩ් කබ්රාල් මහතා වෙනුවෙන් පෙනී සිටි ජනාධිපති නීතිඥවරයා වාචිකව කරුණු දක්වා තිබුණු අතර එම කරුණුවලට අනුව ප්‍රතිවිරෝධතා අල්ලස් කොමිසම ස්ථීර ත්‍රිපුද්ගල මහාධිකරණය හමුවේ ගොනුකර ඇති අතර විත්ති පාර්ශ්වය විසින් ඊට ප්‍රතිවිරෝධතා වාචිකව ගොනුකර ඇත.
ලිඛිත දේශන ජූලි 02 වනදාට පෙර ගොණුකරන ලෙසත් අධිකරණය නියෝග කර තිබේ.
ග්‍රීසිය දැඩි ආර්ථික අර්බුදයකට ලක්ව සිටියදී, ඒ බව දැන දැනම ග්‍රීක රජය විසින් නිකුත් කරන ලද බැඳුම්කර මිලදී ගැනීමෙන් රජයට රුපියල් කෝටි 184කට අධික පාඩුවක් කිරීමේ චෝදනාව මත අල්ලස් කොමිසම විමර්ශනයක් ආරම්භ කර තිබුණි.
හිටපු මහ බැංකු අධිපති අජිත් නිවාඩ් කබ්රාල්, හිටපු නියෝජ්‍ය අධිපති ධර්මසේන ධීරසිංහ, සහකාර අධිපතිවරුන් වන දොන් වසන්ත ආනන්ද සිල්වා සහ එම්.ඒ. කරුණාරත්න යන අයට එහිදී චෝදනා ගොනු කෙරුණු අතර පසුගිය වසරේ දෙසැම්බර් 10 වැනිදා හිටපු මහ බැංකු අධිපති අජිත් නිවාඩ් කබ්රාල්, කොන්දේසි සහිතව නිදහස් කිරීමටත්, සෙසු විත්තිකරුවන් තුන්දෙනා කොන්දේසි රහිතව නිදහස් කිරීමටත් කොළඹ මහාධිකරණය නියෝග කරන ලදී.
හිටපු මහ බැංකු අධිපතිවරයා නිදහස් කළ කොන්දේසිය අනුව එම ගනුදෙනුවෙන් සිදුවූ රුපියල් කෝටි 184කට අධික අලාභය, මාස තුනක් තුළ ශ්‍රී ලංකා මහ බැංකුවට බැරකළ යුතු බවට නියෝගයේ සඳහන්ව තිබුණු අතර එම කාලසීමාව පසුගිය මාර්තු 10 වැනිදායින් අවසන් විය.
එහෙත් එකඟ වූ කොන්දේසි සම්පූර්ණ නොකිරීම හේතුවෙන්, යළි අධිචෝදනා ගොනු කෙරෙන අතර නඩුව විභාගයට ස්ථිර විශේෂ ත්‍රිපුද්ගල මහාධිකරණ යක් පත්කරන්නැයි අල්ලස් කොමිසම අගවිනිසුරුවරයාගෙන් ඉල්ලීමක් කර තිබුණි.
ඒ අනුව අදාළ ස්ථිර විශේෂ ත්‍රිපුද්ගල මහාධිකරණය ස්ථාපිත කරන ලදී.
2011 වසරේදී සිදු කළ ග්‍රීක බැඳුම්කර ගනුදෙනුවට අදාළව හිටපු මහ බැංකු අධිපති අජිත් නිවාඩ් කබ්රාල් මහතාට එරෙහිව 2012 වසරේ ඔක්තෝම්බර් මස 12 දින පාර්ලිමේන්තු මන්ත්‍රි සුජීව සේනසිංහ විසින් ශ්‍රේෂ්ඨාධිකරණයේ නඩුකරයක් ගොනු කළ අතර 2024 වසරේ අප්‍රේල් මස 03 වැනිදා අල්ලස් කොමිසම විසින් කොළඹ මහාධිකරණය හමුවේ නඩුකරයක්ද ගොනු කරන ලද අතර නැවත අල්ලස් කොමිසම විසින් 2024 වසරේ අගෝස්තු මස 16 වැනිදා කොළඹ මහාධිකරණය හමුවේ නඩුකරයක්ද පවරන ලදි.
