රෂිකා හෙන්නායක ජූලි 08, කොළඹ LNW :
ශ්‍රී ලංකාව සිය මූල්‍ය පද්ධතිය තුළ ක්‍රිප්ටෝ මුදල් සම්බන්ධ ව්‍යාපාර නියාමනය කිරීම සඳහා නව නීතිමය රාමු හඳුන්වා දීමට සූදානම් වෙමින් සිටින බව වාර්තා වේ.
මෙහි මූලික පියවර ලෙස, ජාත්‍යන්තර මූල්‍ය ක්‍රියාකාරී බලකායේ ප්‍රමිතීන්ට අනුකූල වෙමින් මුදල් විශුද්ධිකරණය වැළැක්වීමේ පනතට සංශෝධන එක් කිරීමට රජය අපේක්ෂා කරයි.
මෙමඟින් අතථ්‍ය වත්කම් සපයන ආයතන නිසි ලෙස ලියාපදිංචි කිරීම සහ ඔවුන්ගේ ගනුදෙනු නිරීක්ෂණය කිරීම සිදු කරනු ලබන අතර, එම ආයතන මූල්‍ය බුද්ධි ඒකකය වෙත වාර්තා කිරීමට බැඳී සිටිනු ඇත.
මීට අමතරව, ඩිජිටල් ආර්ථික අමාත්‍යාංශය හරහා ක්‍රිප්ටෝ ව්‍යාපාර සඳහා විධිමත් බලපත්‍ර ක්‍රමයක් සහ බදු ප්‍රතිපත්තියක් සැකසීම පිළිබඳව ද අවධානය යොමුව තිබේ.
මෙම ප්‍රතිසංස්කරණවල ප්‍රධාන අරමුණ වන්නේ බදු පැහැර හැරීම් සහ නීති විරෝධී මූල්‍ය කටයුතු පාලනය කරමින් ශ්‍රී ලංකාවේ මූල්‍ය විනිවිදභාවය ජාත්‍යන්තර මට්ටමින් තහවුරු කිරීම බව සඳහන් වේ.
