සටහන: සශිකලා මධුෂාණි
අගෝස්තු මස 03: ලෝකය(අවුට්බවුන්ඩ් ටුඩේ): දකුණු කොරියාව ඉතිහාසයේ වාර්තා වූ ඉහළම උෂ්ණත්වය අත්විඳිමින් සිටින අතර, රට පුරා පවතින දරුණු උෂ්ණ තරංගය හේතුවෙන් බලධාරීන් ජනතාවට “එළිමහන් සියලු ක්රියාකාරකම් වහාම නවත්වන්න” යන හදිසි අනතුරු ඇඟවීම නිකුත් කර තිබේ.
දකුණු කොරියාවේ ගිනිකොන දිග යැංසාන් (Yangsan) නගරයේ උෂ්ණත්වය සෙල්සියස් අංශක 42.5 දක්වා ඉහළ ගොස් ඇති අතර, එය රටේ වසර 100කට අධික කාලයක කාලගුණ වාර්තා ඉතිහාසයේ වාර්තා වූ ඉහළම උෂ්ණත්වය ලෙස සටහන් වී ඇත. එම ප්රදේශයේ අඛණ්ඩව පස්වන දිනටත් සෙල්සියස් අංශක 40 ඉක්මවූ උෂ්ණත්වයක් වාර්තා වී තිබේ.
දකුණු කොරියානු කාලගුණ විද්යා අධිකාරිය (KMA) ප්රකාශ කළේ, වායුසමීකරණ නොමැති ගෘහස්ථ ස්ථාන පවා අනතුරුදායක මට්ටමකට උණුසුම් වී ඇති බැවින්, හැකි සෑම අවස්ථාවකම සිසිල් ස්ථානවල රැඳී සිටින ලෙසත් ප්රමාණවත් ලෙස ජලය පානය කරන ලෙසත් ජනතාවගෙන් ඉල්ලා සිටින බවයි.
මෙම අධික උෂ්ණත්වය හේතුවෙන් රටේ ප්රදේශ 20කට වැඩි සංඛ්යාවක හදිසි උෂ්ණ තරංග අනතුරු ඇඟවීම් ක්රියාත්මක කර ඇති අතර, ඇතැම් ප්රදේශවල ක්රීඩා තරග සහ එළිමහන් වැඩසටහන් ද අවලංගු කර තිබේ.
විද්යාඥයන් පෙන්වා දෙන්නේ, මානව ක්රියාකාරකම් හේතුවෙන් උත්සන්න වන දේශගුණික විපර්යාස නිසා මෙවැනි දරුණු උෂ්ණ තරංග ලොව පුරා වැඩි වශයෙන් හා වැඩි තීව්රතාවයෙන් දක්නට ලැබෙන බවයි
